Нийслэлийн Дэд бүтэц” төслийн хүрээнд энэ онд МҮОНРТ орчмын хорооллын 6 хэсгийн 6 ширхэг ус, дулаан дамжуулах төвийн барилгын зураг төсөл, барилга угсралтын ажлыг хийхээр болсон. Уг ажлыг хийх гүйцэтгэгчийг сонгон шалгаруулсан ч иргэд газраа чөлөөлөхгүй байгаагаас инженерийн шугам сүлжээний ажил зогсоод байгаа юм. Тиймээс гүйцэтгэгчдийн зүгээс Газрын тухай хуулинд заасны дагуу тухайн газруудыг чөлөөлж, төслийг хэрэгжүүлэх нөхцөл боломжоор хангаж өгөх талаар нийслэлийн Засаг дарга Э.Бат-Үүлд хүсэлт гаргаад байна.
 
Тус хороолол нь Баянгол дүүргийн XI хороо, Чингэлтэй дүүргийн VII, VIII хорооны нийт 35 га газрыг хамарч байгаа аж. НИХТ-ын баталсан хэсэгчилсэн ерөхий төлөвлөгөөний дагуу 4200 айлын орон сууц баригдаж, 17700 хүн амтай болохоор тооцоолсон бөгөөд 4250 сурагчтай сургууль, 1060 хүүхдийн цэцэрлэг, өдөрт 620 хүн үзэх өрхийн эмнэлэг, 850 ажлын байр бүхий оффисын барилга, 1600 орчим хүн ажиллах соёл ахуй үйлчилгээний барилга, байгууламжууд баригдах юм байна.