С.Даланжаргал: Шаардлага хангахгүй барилгуудыг үе шаттайгаар дахин төлөвлөнө

С.Даланжаргал: Шаардлага хангахгүй барилгуудыг үе шаттайгаар дахин төлөвлөнө
Нийслэл хотод ашиглалтын шаардлага хангахгүй болсон орон сууц багагүй бий. Харин тэдгээрийг дахин төлөвлөж шинээр орон сууц барих тухай яриа саяхнаас өрнөсөн. Эхний ээлжийн 21 байршилд дахин төлөвлөлт явагдах гэж байгаа тухай нийслэлийн ерөнхий төлөвлөгөөний газраас /НЕТГ/ мэдэгдсэн юм. Энэ тухай тус газрын Дахин төлөвлөлтийн хэлтэсийн ахлах мэргэжилтэн С.Даланжаргалаас тодруулсан юм.
-Улаанбаатар хотын Ерөнхий төлөвлөгөөнд тусгасны дагуу 2016 он хүртэл 4600 айлын орон сууцыг дахин шинэчлэхээр төлөвлөсөн.  Нийслэлийн нутаг дэвсгэрт өнөөдрийн байдлаар ашиглалтын шаардлага хангахгүй 150 барилга байгаагаас эхний ээлжийн 21 барилгыг дахин төлөвлөж барилга барихаар болсон. Энэ нь Баянгол дүүргийн 20 дугаар хорооны нутаг дэвсгэрт байрлах 30 дугаар байр, Хан-Уул дүүргийн 2 дугаар хорооны нутаг дэвсгэрт байрлах Нэхмэлийн   1, 2, 3, 5, 6, 7, 10, 11, 12, 13, 16, 17, 18 дугаар байр, Хан-Уул дүүргийн 3 дугаар хорооны нутаг дэвсгэрт байрлах Нэхмэлийн    4, 8, 9, 15, 19 дүгээр байр,  Арьс ширний 25, 26 дугаар байрны барилгууд юм.
-Тэгэхээр эдгээр байршлуудад барилга барих компанийг сонгон шалгаруулалт хийх нь тодорхой.  Энэ хэзээ хийгдэх бол?
-Эхний ээлжинд иргэдтэйгээ зөвшилцөх шаардлагатай юм. Манай иргэд нааштай хүлээж авч байгаа. Гэсэн хэдий ч эцсийн байдлаар тохиролцоогүй болохоор дээрх орон сууцны оршин суугчидтай уулзаж ямар хэлбэрээр барилгажуулвал зохилтой болох талаар тохиролцсоны дараа л сонгон шалгаруулалт явагдана.  Харин дахин төлөвлөлт явагдах газрыг эрт зарлаж байгаа нь дээрх барилгуудын 1 давхарт үйлчилгээ эрхлэдэг иргэд, аж ахуй нэгжүүдэд өөр байршил олохыг анхааруулах, сануулах зорхилготой. Түүнчлэн банк санхүүгийн байгууллагууд дээрх барилгуудыг барьцаалсан зээлийн үйлчилгээндээ анхаарах байх.  
  Хувийн хэвшлийн хөрөнгө оруулалтаар төслийг хэрэгжүүлэх учраас төсөл хэрэгжүүлэгчийг нээлттэйгээр сонгон шалгаруулж 3 талт гэрээ байгуулан ажлыг эхлүүлнэ. Төсөл хэрэгжүүлэгч нь гурван талт гэрээ байгуулаагүй, сууц өмчлөгчид тухайн орон сууцны зах зээлийн үнийг төлж чөлөөлөх үйл ажиллагаа хэрэгжүүлэхээр журамд заасан.
 
-Шаардлага хангахгүй 150 барилга байгаа гэж байна. Үлдсэн барилгуудад мөн ялгаагүй дахин төлөвлөлт хийж, шинээр барилга барих уу?
-Тэгэлгүй яахав. Шат дараатайгаар хийгээд явна.

Холбоотой мэдээ