Баянзүрх, Хан-Уул, Сонгинохайрхан, Сүхбаатар, Налайх, Багануур, Багахангай дүүрэгт харъяалагдах нийт 15 309 га газар бүхий 52 байршилд иргэдэд гэр бүлийн хэрэгцээний зориулалтаар газар шинээр өмчлүүлэхээр болж, яригдаж эхэлснээс хойш нэлээд хүлээлт үүсээд буй.
Үүнээс эхний ээлжинд Баянзүрх дүүргийн 20 дугаар хороо Хожуулын ам, Сонгинохайрхан дүүргийн 21 дүгээр хорооны Соёондын ам, Хан-Уул дүүргийн 12, 13 дугаар хороонд байрлах Эрдэнэтолгой, Багануур дүүргийн 4 дүгээр хороо Тариан булагийн 1-р хэсэг, Баганхангай дүүргийн 2 дугаар хороо Бор-Үзүүр гэсэн 5 байршилд өнөөдрөөс эхлэн цахим системийн тусламжтайгаар иргэдийн хүсэлтийг өнөөдөрөөс хүлээн хүлээн авч эхэллээ.
Нийслэлийн Өмчийн харилцааны газраас цахим хэлбэрээр иргэнд анх удаа газар өмчлүүлэх болсныг хонх цохин их л ёслол төгөлдөр нээв.
Үүнтэй холбоотойгоор иргэдэд тохиолдох түгээмэл асуултын хариултыг тоймлон танилцуулж байна.

-Цахим бүртгэл хэд хоног үргэлжлэх вэ? 

-2014 оны 8 дугаар сарын 1-ний өдрийн үдийн 12 цагт эхэлж, мөн сарын 15-ны өдрийг хүртэл үргэлжлэнэ. Энэ хугацаанд 24 цагийн турш бүртгүүлэх бүрэн боломжтой бөгөөд гадаадад ажиллаж, амьдарч байгаа иргэд ч өөрийн биеэр бүртгүүлэх боломжоор хангагдаж байгаагаараа онцлог.

-Газар хамтран эзэмшдэг бол хүсэлтээ гаргаж болох уу?

-Урьд нь газар нэг удаа үнэгүйгээр дангаараа эсвэл хамтран өмчилсөн иргэд цахим системд хандах боломжгүй.
-Нэг гэр бүлийн  хэдэн ч гишүүн хүсэлт гаргаж болох уу?

-Нийслэлд 2013 оны 5 дугаар сарын 30-наас өмнө бүртгэлээ баталгаажуулсан нийслэлд бүртгэлтэй, урьд нь газар өмчилж байгаагүй бүх насны иргэд хүсэлт гаргах боломжтой. Харин дээрх хугацаанаас хойш төрсөн нийслэлийн иргэн 52 байршилд газар өмчилж дуустал хүлээх шаардлагатай.

-Одоо харъяалагдаж байгаа дүүрэгтээ л хүсэлт гаргах уу? Эсвэл хамаагүй юм уу?

-Оршин суугаа дүүргээс үл хамааран зарлагдсан аль ч байршлаас сонголт хийж, хүсэлт гаргах боломжтой.

-НИТХ-аас баталсан 52 байршилд хүүхэд итгэмжлэгдсэн төлөөлөгчөөрөө дамжуулан газар өмчлөх хүсэлтээ гаргаж болох уу?

-Болно. Түүнчлэн хувийн гар утасгүй, өөрийн нэр дээр цахим хаяггүй бол итгэмжлэгдсэн төлөөлөгчийнхөө утасны дугаар, цахим хаягийг ашиглаж болно.

-Дараагийн байршлуудад газар өмчлөх ажил хэзээнээс эхлэх вэ?

-Цаг хугацаа нь тодорхойгүй байгаа. Эхний 5 байршлын газар өмчлөлийн бүртгэл, баталгаажуулалтын ажил эцэслэн дууссаны дараа, дараагийн байршлуудын эхлэх хугацааг зарлана.

-Нэг байршилд хэд хэдэн хүн хүсэлт гаргасан бол сонголтыг хэрхэн хийх вэ?

-Нэг байршилд хүсэлт гаргасан иргэд нь өмчлөгдөх боломжтой нэгж талбарын тооноос их байгаа нөхцөлд программ автомат үйлдлээр санамсаргүйгээр сонголт хийж, нэгж талбарын өмчлөх эрхийг сонгоно.
-Цахим бүртгэлд хэрхэн хамрагдах вэ?
-Нийслэлийн өмчийн харилцааны газрын www.umch.ub.gov.mn сайтад хандан цахим бүртгэл хэсэгт нэвтрэн өмчлөхийг хүсэж буй газраа сонгоно. Газраа сонгосны дараа өргөдөл хэсгийг дарж хувийн мэдээллээ үнэн зөв оруулан батлгаажуулах гэсэн хасгийг дарна. Үүний дараа таны гар утас болон мейл хаягаар хүсэлт баталгаажсан тухай мэдээлэл ирэх бөгөөд үүний хамт баталгаажуулалтын код ирэх юм. Баталгаажуулалтын дугаарыг цахим бүртгэлийн баталгаажуулах хэсэгт оруулснаар бүртгэл амжилттай болох юм. Бүртгэл амжилттай болсон тухай тухайн систем тэр даруй мэдэгдэнэ. Хэрэв энэ удаагийн 5 байршилд иргэний өмчилж авахыг хүссэн газар сонгогдоогүй тохиолдолд баталгаажуулалтын кодоо хадгалж байгаад дараагийн байршлуудруу тухайн кодооро хүсэлтэй илэрхийлэх юм. Иймд иргэд анх бүртгүүлэхдээ авсан баталгаажуулалтын кодоо сайтар хадгалах нь зүйтэй  

-Газар өмчлөх эрхээ авсан иргэн газрын гэрчилгээгээ яаж авах вэ?

-Журмын дагуу газар өмчлөлийн цахим системээс газар өмчлөхөөр сонгогдсон тухай хариу хүлээн авсан иргэн нь ажлын 10 хоногт багтаж газар нь сонгогдсон дүүргийн Өмч, газрын харилцааны албанд хандаж өргөдлөө хуульд заасан материалын хамт цаасаар өгөх бөгөөд тодорхой  хугацааны дараа газар өмчлөх шийдвэрээ гардаж авах боломжтой.