Барилгын салбарын цогц мэдээллийг түгээгч Барилга.МН сэтгүүлийн 2 дугаар сарын шинэ дугаар захиалагч, уншигчдын гарт очиход бэлэн боллоо. Энэ дугаараас барилгын салбарт 2013 онд болж өнгөрсөн онцлох үйл явдлын товчоон, орон сууцныхаа ашигтай талбайн хэмжээг тооцож гаргах хүсэлтэй байгаа иргэдэд зориулсан зөвлөмж, будгийн ажил гүйцэтгэх үед аюулгүй ажиллагааг хэрхэн хангах тухай зөвлөгөө, Барилга, хот байгуулалтын дэд сайд Г.Байгалмаатай хийсэн сонирхолтой ярилцлага, Улаанбаатар хотын хот төлөвлөлтийн өнөөгийн байдал, тулгамдаж буй асуудлын талаар холбогдох төрийн байгууллагын удирдлага, мэргэжилтнүүдтэй хийсэн ярилцлага, асуудал дагуулсан барилгуудын талаарх сурвалжлага, бусад мэдээ мэдээллийг уншихаас гадна хүйтний улиралд бетон цутгах арга технологитой танилцаж, ажил гүйцэтгэлийн үнэ ханш, барилгын материал, шинэ орон сууцны дэлгэрэнгүй үнэ ханшийн мэдээллийг манай сэтгүүлээс авах боломжтой. 

Ингээд сэтгүүлийн шинэ дугаарын товч агуулгыг хүргэе.

Мэдээ мэдээлэл:

     Барилгын салбарт мэргэжилтэй боловсон хүчин, ажиллах хүч дутмаг байдаг талаар сүүлийн хэдэн жил тасралтгүй ярьлаа. Барилгын үйлдвэрлэл улам бүр эрчимжиж буй өнөө цагт барилгын салбарын мэргэжилтэн бэлтгэх үйл ажиллагаа ямар хэмжээнд байгаа талаар сэтгүүлийн энэ дугаарт сурвалжлан хүргэж байна.

Дугаарын зочин:

      Сэтгүүлийн дугаарын зочноор Монголын барилгын салбарт тэргүүлэгч “Заг” группын ерөнхий захирал Б.Нэмэхбаатар уригдаж оролцлоо.

... Ер нь залуустаа хандаж хэлэхэд  хүмүүсийг юу эдэлж хэрэглэж байгаагаар нь биш юу хийж бүтээж байгаагаар дүгнэх хэрэгтэй шүү. Тэр цаг нь ч ирсэн. Мөн амар аргаар мөнгө яаж олох вэ гэж ярьдаг хүмүүст зөвлөхөд бизнес хийнэ гэдэг чинь боломжийг олж харах явдал байдаг юм. Аливаа юмыг хөгжүүлэх, хийх бүтээх талаас нь харнаа гэдэг чинь чиний хувьд бөөн бөөн боломжийг олгох болно...

Асуудал хөндсөн сэдэв:

Сэтгүүлийн энэ удаагийн “Асуудал хөндсөн сэдэв” булангаар өнөөг хүртэл хэрэгжүүлж байсан хотын ерөнхий төлөвлөгөөнүүдийн  алдаа оноо, хот байгуулалтын өнөөгийн байдал, цаашид авч хэрэгжүүлэх арга хэмжээний талаар онцоллоо.

Дуулгах мэдээ:

Зөвлөх архитектор Я.Амарсайханы бэлтгэсэн Монгол гэрийн архитектур, хөгжлийн талаарх сонирхолтой мэдээллийг эндээс уншаарай.

...Орчин үед гэрийн үндсэн зарчмыг  алдагдуулахгүйгээр барилгын  материалаар байнгын, суурин байдлаар мод, металл, бетон хийц ашиглан гэрийг барьж ашиглах боллоо. Энэ бол гэрийн хөгжлийн бас нэгэн шинэ дэвшлийн үе болно гэж үзэж байна. Мөн аяны зориулалтаар авч явж байхад зориулсан тусгай уутанд багтах эвхэж, угсардаг гэр зохиосон хүн ч байна...

Хэн юу хэлэв:

Гэр хорооллын дахин төлөвлөлтийн төслийг хэрэгжүүлж буй компаниудын ажлын явцын талаар манай сэтгүүл сар бүр мэдээлж байгаа. Энэ удаа Баянзүрх Дүүргийн 16-р хорооны газар нутаг дээр бүтээн байгуулалт хийхээр шалгарсан  “Баганат Өргөө” ХХК-ний ерөнхий инженер Б.Нанзаддоржтой ярилцлаа.

... Манай зураг төслийн багийнхан 960 хүүхдийн суудалтай хоёр сургууль,  240 хүүхдийн гурван цэцэрлэг барихаар тусгасан. Хувийн хэвшлийн цэцэрлэг сургуулиуд бас баригдах байх гэж бодож байна. Үлдсэн хэсэг дээр нь үйлчилгээний байгууллагын зориулалтаар барилга байгууламж баригдана...

Барилга өгүүлж байна:

Жуулчны гудамжинд байрлах “Урт цагаан” нэртэй урт цагаан барилгын өчлийг та бүхэндээ хүргэж байна. 

...Би онгирч байгаа юм биш шүү. Миний нэрийг мэдэхгүй Монгол хүн гэж тун ховор. “Урт цагаан дээр уулзъя, урт цагаанд ороод үсээ засуулчих, урт цагаанд хэмжээг нь өгөөд захиалчих, урт цагаанд байна лээ, урт цагааны урдаас авчихъя” гэсэн ийм л яриаг өнгөрсөн 54 жилийн туршид би ард иргэдийн амнаас сонссон доо...

Мэргэжлийн зөвлөмж:

Удахгүй урин дулааны цаг ирж, барилгын ажил эхлэх болно. Барилга угсралтын ажлаас урьтаж хайрга, дайрга, элс зэрэг түгээмэл тархацтай ашигт малтмалын олборлолтын ажил эхэлдэг тул сэтгүүлийн энэ дугаартаа чулуун ба шороон ордыг ашиглах зөвлөмжийг бэлтгэж орууллаа.

Хаус дизайн:

“Хаус дизайн” булангаараа Нью Йорк хотод нисэх онгоцны томоохон буудлын дэргэд байрлах нэгэн гайхалтай сууцыг танилцуулахаар бэлтгэлээ.