Полистрол хавтангийн зарим нийтлэг сул тал

Полистрол хавтангийн зарим нийтлэг сул тал

Полистрол хавтангын нийтлэг дутагдалын талаар дэлгэрэнгүй тайлбар хийвэл:

1.      Барилгын гадна өнгөн тал тэгш, гөлгөр байж чаддаггүй

     Энэхүү сул тал нь барилгын өнгө үзэмжинд шууд нөлөөлдөг. Хамгийн гол шалтгаан нь өрөгийн өндрийн дагуух алдаанаас үүдэлтэй юм.

Өрөг чанаргүй болох дараах шалтгаанууд байна.

1.1.      Зориулалтын шат вандан засаж хийдэггүй

1.2.      Давхар бүрт отвес тавьж, давхар хяналт шалгалт хийдэггүйгээс хүлцэх /давхарт 15 мм/ алдааг зөрчдөг

1.3.      Намар сэрүүний улиралд, цөөн хүн хүчээр хугацаа шахаж хийдэг

1.4.      Тоосго стандарт хэмжээ бариагүй, зөөвөр тээврийн явцад эвдэрсэн, бат бөхийн чанарын үзүүлэлт муу тоосгоор барьсан.

1.5.      Өрөгийн хэмжээ тооцож хийдэггүйгээс хамгийн дээд талын тоосгоны өрөгийн заадасгүй эсвэл тал тоосго оруулдаг

1.6.      Өрөгт их хэмжээний тал тоосго ашигладаг

1.7.      Зуурмагын чанарыг шалгадаггүйгээс хэт аргуун эсвэл хэт шингэн зуурмагаар өрлөг хийдэг гэх мэт.

2. Барилгын үндсэн хана, дулаалга хоёрын хооронд зай завсар үүсдэг, тэр нь яваандаа мөөгөнцөр, амьд организм үүсэх таатай орчин үүсгэдэг

    Тоосго болон дулаалгын материалын хооронд уур ус тусгаарлагч, цавуулаг хольц, шавардлага хийхгүйгээр шууд хадаасаар тогтоодог уг хоёр гадаргуугийн хооронд чийг, уур ус хуримтлах үндсэн нөхцөл болж байна. Ийм орчинд мөөгөнцөр, амьд организм үүсэж улмаар барилгын дулаалгыг дотроос нь гэмтэж эвдэх нөхцөл үүсдэг байна.

Дараах байдлаар барилгын гадна ханын дулаалгын хийх шаардлагатай.

1.      Стандартын дагуу өрөгдсөн хана /нэг давхарт 15мм-ээс ихгүй/

2.      Шавардлага /нэг давхарт 5 мм-ээс ихгүй/

3.      Гадна ханыг сайтар цэвэрлэж байж зориулалтын цавуугаар жигд түрхлэгээ хийж полистрол хавтанг наах ба тэлэгчээр бэхэлж тогтооно.

4.      Тэлэгч хадаас нь хөөсөнцөр хавтанг эвдэхгүйгээр урьдчилан бэлтгэсэн зориулалтын нүхээр сүвлэгдэх шаардлагатай. /Үйлдвэрээс бэлдсэн байж болно эсвэл тусгай багажаар нүхний ханыг хайлуулан бэлдвэл тэлэгч хадаасыг шууд хөөсөнцөрийн ханыг эвдэх маягаар суулгаж, эвдрэл үүсгэдэг байдлыг арилгана/ 1м2- талбайд 8-10 тэлэгчтэй боолтоор бэхлэнэ.

5.      Зориулалтын тортой заслын үе

6.      Гадна ханын зориулалтын эмульс эсвэл бусад төрлийн гадна талын зориулалттай хөнгөн төрлийн эсвэл будагч материал

3.      Салхины ачааллыг тэсвэрлэдэггүй ховхорч унадаг

    Салхины ачааллыг тэсвэрлэхгүй ховхорч ундаг байдал нь угсралтын явцад технологийн горим зөрчсөнөөс болон тэлэгч хадаасыг хэт цөөн бага хэрэглэсэнтэй холбоотой. Иймд өмнө нь дурьдсан дараалын дагуу ажлыг гүйцэтгэж, барилгын хамгийн захад байрлах дулаалгын хавтанцарын тэлэгч хадаасыг голд байгаа дулаалгын хавтангийн тэлэгчтэй хадаасны тооноос ахиу хийж байх шаардлагатай.

4.      Галд тэсвэрлэлт байхгүй

    Гадна ханын дулаалагт хэрэглэж буй хөөсөн полистрол хавтан заавал галд авалцахгүй, галыг дэмждэггүй байх шаардлагыг хангаж байх ёстой. Огт шатдаггүй хөөсөнцөр гэж байхгүй. Галын аюулын үеийн эрсдэлтэй бол нэмэлт галын аюул эсэргүүцэгч будагч бодисуудаар хамгаалах шаардлагатай. Гэхдээ будгийн найрлагыг анзаарахгүй бол хөөсөнцөр хавтан нь зарим хүчтэй бодисд хайлж үгүй болох, уусах шинж чанарыг үзүүлнэ.

5.      Хавтан хоорондын залгаасаар салхи сийгэдэг, дулаан алддаг

   Полистрол хавтанг угсрах явцад тэлэгч боолтыг хадах, хавтангуудыг зөрүүлэггүй тулгаж хийх, барилгын өнцөг булангийн хэсэгт зориулалтын ам дарагчаар ам даруулахгүй байх, цонх суулгахдаа дулаалгын хэсгийн дайруулж буруу суулгах гэх мэт шалтгаануудаас үүдэж байна. Иймд ханын дулаалгын угсралтыг сайтар, зай завсаргүй бин битүү гүйцэтгэх нь энэхүү алдаа дутагдалыг гаргахгүй байх гол нөхцөл болно.

6.      Хөлдөлт, халалтын үед хөөсөнцөр үрлүүд эвдрэлд ордог гэх мэт нийтлэг дутагдалууд гарч байна.

    Манайд тохиолдож буй түгээмэл дутагдлын нэг. Энэхүү дутагдал нь барилгын насжилтанд нөлөөлхөөс гадна, оршин суугчидын тав тухтай байдалд ч нөлөөлж байдаг учраас материалын сонголтыг эхнээсээ зөв хийх шаардлагатай юм. Дулаалгын материал нь нь өөрөө дор хаяж хөлдөлт гэсэлтийн 50 циклийг давах техникийн шаардлагыг хангаж байх ёстой. Ерөнхийдөө энэ шаардлагыг хангахын тулд материалын нягт нь 40 кг/см3 –ээс дээш байх мөн шаардлагатай. Техникийн энэ шаардлагыг манайд тохирлын гэрчилгээ олгох явцад л нэг шалгахаас үйлдвэрлэлийн явцад шалгахгүй байна. Тиймээс үйлдвэрлэлийн явцад үйлдвэр өөрөө эсвэл тодорхой хугацаанд хөндлөнгийн шалгалтыг уг материалд хийж байх шаардлагатай юм.

Идэвхитэн бичигч:   “ITGM” ХХК-ийн ерөнхий инженер Б.Мөнхбаатар  

 

 

                                                           

Холбоотой мэдээ