“Мишээл экспо” төвд 2 дахь өдрөө үргэлжилж байгаа “Барилга экспо-2014” олон улсын үзэсгэлэн яармагийн үеэр барилгын  материал үйлдвэрлэгчдийн дунд “Үйлдвэрлэл ба инноваци” сэдэвт уулзалтыг зохион байгууллаа.  Энэхүү уулзалтыг Барилгын зөвлөгөө мэдээллийн төв, “Барилга.МН” сайтаас  БХБЯ, МБМҮХ, БНСУ-ын Ногоон барилгын технологийн хүрээлэнтэй хамтран зохион байгуулсан бөгөөд барилгын материал үйлдвэрлэлд орчин үеийн дэвшилтэд технологийг нэвтрүүлэх, салбарын зарим тулгамдсан асуудлыг шийдвэрлэх, үйлдвэрлэгчдийн санаа бодлыг сонсох зорилготой байсан юм.        
Зорилгоо ч амжилттай хэрэгжүүлж 50 шахам үйлдвэрлэл эрхлэгчид өөрийн санал бодлоо солилцон, төрийн бодлого хэрэгжүүлж байгаа яам, өөрийн харьяа холбооны удирдлагуудад дуу хоолойгоо хүргэж чадлаа. Түүнчлэн энэхүү хурлыг зорин ирсэн БНСУ-ын Ногоон барилгын технологийн хүрээлэнгийн мэргэжилтэнүүдээс  Монголд цахилгаан эрчим хүчний хэмнэлтэй дулаахан тохилог, “ногоон барилга” барих туршлага, арга барилтай танилцсан юм. Уулзалтанд БХБЯ-ны барилгын материал хариуцсан мэргэжилтэн Г.Цэрмаа, БЗМТ-ийн захирал С.Батсүх, БМҮХ-ны дэд тэргүүн Ц.Баатарсүрэн, БМҮХ-ны ерөнхий нарийн бичгийн дарга Н.Оч нарын албаны хүмүүс оролцсон.

 Эдгээр хүмүүс өөрсдийн хийж буй ажлын талаар танилцуулж, илтгэл тавьсан бөгөөд БХБЯ-наас нийслэл хотын захиргаатай хамтран барилгын гадаад өнгө үзэмжийг сайжруулах тал дээр хамтран ажиллаж байгаа бол барилгын материалын үнийг тогтвортой байлгах үүднээс 3 зорилго бүхий дэд хөтөлбөрийг хэрэгжүүлж байгаагаа танилцуулсан юм. Мөн сайн барилга сайн боловсон хүчээс эхтэй учир барилгын салбарын хүний нөөцийг бүрдүүлэх тал дээр анхаарч ажиллаж байгаа тухайгаа дурьдаж байлаа.


Харин БМҮХ-оос “Цахилгаан станцын хаягдал үнсийг барилгын материалд хэрэглэх нь” төслийнхөө талаар танилцуулж, энэхүү төсөл амжилттай хэрэгжиж чадвал эдийн засгийн хувьд ихээхэн хэмнэлтэйгээс гадна байгальд ээлтэй  бүтээгдэхүүнийг бий болгож чадах талаар ярьж байсан. Манай улс эрчим хүчнийхээ эх үүсвэрийн 96 хувийг нүүрснээс гаргаж авдаг бөгөөд үүнийг дагаад цахилгаан, эрчим хүчний үйлдвэрүүдэд   хаягдал үнс маш ихээр гардаг аж. Гэтэл С зэрэглэлийн нүүрс нь цементлэг шинж чанарыг өөртөө агуулдаг бөгөөд цемент өөрөө бат бөх болон бэхжүүлэх чанартай байдаг учир үүнийг нь ашиглан барилгын төрөл бүрийн материалыг үйлдвэрлэж болдог. Иймд хаягдал үнсээр ч мөн барилгын материал үйлдвэрлэж болохыг тайлбарлаж байлаа.
Уулзалтын төгсгөлд үйлдвэрлэгчдийн дунд хэлэлцүүлэг явуулж, санал бодлыг нь сонссон нь хүн бүрийн сэтгэлд нийцсэн арга хэмжээ болсон юм.