Барилгын хөгжлийн төвийн удирдлагууд Барилгын салбарын ахмадын хорооны дарга Л.Тогтохбаярыг хүлээн авч, халуун яриа өрнүүлэн, хүндэтгэл үзүүллээ.

Барилгын салбарт Л.Тогтохбаярыг танихгүй хүн ховор. Харин түүнийг барилгын салбарт амьдралынхаа 50 жилийг зориулсан гэдгийг хүмүүс тэр бүр мэдэхгүй. Тэрээр 1963 оны 07 дугаар сарын 01-нд Хотын барилга трестэд хуваарилагдсанаар барилгын салбарт анх  хөл тавьж байжээ. Түүнээс хойш барилгын салбарт нягтлан бодогч, Ерөнхий нягтлан, Санхүүгийн хорооны дарга, Санхүү эрхэлсэн орлогч дарга зэрэг олон ажлыг хашиж  явжээ. Тэрээр 1993 оноос Барилгачдын ахмадын хорооны даргаар ажиллаж байгаа билээ. Түүний хөдөлмөрийг төр засгаас үнэлж 1981 онд Алтан гадас одон, 2012 онд Хөдөлмөрийн гавьяаны улаан тугийн одонгоор тус тус шагнасан байдаг.

Үргэлж залуу үеэ сургаж, ахмад үеэ халамжилж явдаг эрхэм хүн таны цаашдын ажил, амьдралд өндөр амжилт хүсэн ерөөе!