Зайсан, Баянзүрх орчмын шинэ барилгыг дулаанаар хангах боломжгүй

Зайсан, Баянзүрх орчмын шинэ барилгыг дулаанаар хангах боломжгүй

            “Улаанбаатар дулааны сүлжээ” компани нь 1959 оноос нийслэлийн иргэдийг халуун ус, ду­лаанаар хангаж ирсэн бөгөөд 374 км дулааны шугам, найман насос стан­цын тусламжтайгаар хэрэг­лэгчиддээүйлчилгээ үзүүлдэг.ТЭЦ IV нийслэлийн дулааны хэрэгцээний 57 хувийг, ТЭЦ III хэрэглээний 39 хувийг, үлдсэнийг нь ТЭЦ II  үйлдвэрлэдэг ажээ.

        Хотын ду­лааны шугамын 56.7 км-ыг 1977, 76.4 км-ыг нь 1978-1987 онд суурилуулсан бөгөөд 30 жилийн турш ус гүйлгэсээр  ган төмөр нь элэг­дээд байгаа аж. Иймээс нэн тэр­гүүнд хуучин шу­гам хоолойг шинэчлэх шаардлагатай  байгааг “Улаанбаатар дулаа­ны сүлжээ” компанийнхан онцолж байсан. 

Өнгөрсөн онд Нийслэлийн Засаг дарга Э.Бат-Үүл захирамж гаргаж зөвшөөрөл аваагүй баригдсан барилгуудыг дулаан, цахил­гаанаар хангахгүй гэж мэдэгдсэн ч барилгын компанийнхан Барилга, хот бай­гуулалтын яам, Эрчим хүчний яа­маар эргэлдэх болсон байна. Дулаан, цахилгаан авахын тулд оршин суугчдыг урдаа барьж заргалдах болсноос арга буюу уг зөв­шөө­рөлгүй барилгын  оршин суугчдыг “Улаанбаатар дулааны сүлжээ” компаниас түр гэрээгээр дулаанаар хангасан байна. Харин энэ жил ийм зүйл давтагдах ёсгүй, оршин суугчдын хохирлыг компани барагдуулах ёстой гэдгийг хотын дарга Э.Бат-Үүл санууллаа. Иймээс компаниуд барилга барих бол Эрсдэлийн сан байгуулж, түүгээрээ хохир­сон иргэдийн  эрх ашгийг нөхдөг болох гэнэ.  Түүнчлэн “Улаанбаатар дулааны сүлжээ” компаний гүйцэтгэх захирал Р.Хайдав хэлэхдээ  “Зайсан, Баянзүрх орчимд шинээр барьсан барилга, орон сууцуудыг дулаанаар хангах боломжгүй. Мөн хамгаалалтын зурваст барилга барьсан барилгын зөвшөөрлийг цуцлах хүртэл арга хэмжээ авах шаардлагатай байгаа. Бид одоогоор шүүхээр зарга үүсгэж байж хамгаалалтын зурвасаа чөлөөлж байна” гэсэн юм.

          Улаанбаатар хотыг дулаанаар хангах өвөлжилтийн бэлтгэл ажлаа 70 хувь гүйцэтгээд байгаа ажээ.  Улаанбаатар хотын  дулааны сүл­жээ­ний нэвтрүүлэх чадварыг нэмэгдүү­лэх, 2013-2014 оны өвөлжилтийн бэлт­гэл хангах зорилгоор улсын төсвийн хөрөнгө оруулалтаар болон өөрийн хөрөнгөөр 5.8 тэрбум төгрөгийн засва­рын ажил хийж байгаа юм. Тухайлбал, улсын төсвийн хөрөнгө оруулалтаар ф300-700мм голчтой 5150м урт шугам хоолой, нам даралт өргөх насос станц №3-ын хүчин чадлыг нэмэгдүүлэн хувьсах хурдны насосоор шинэчлэн солихоор болсон байна. Түүнчлэн өөрийн хөрөнгөөр ф150-700мм голч бүхий 2820.7 метр урт шугам хоолойг өргөтгөж байгаа ажээ. Энэ жилийн хувьд нийслэлийн дулааныг хугацаандаа буюу есдүгээр сарын 15-нд өгөх бүрэн боломжтой гэв.

Холбоотой мэдээ