Барилга барих тусгай зөвшөөрлийн бичиг баримтын бүрдүүлэлт харьцангуй хялбар болсон гэх юм. Энэ талаар тодруулахгүй юу?

     Хот байгуулалтын баримт бичиг, барилга байгууламжийн зураг төсөл боловсруулах, барилга угсралтын ажил гүйцэтгэх, өргөх байгууламж, түүний эд ангийн үйлдвэрлэл, угсралт, засвар үйлчилгээ тусгай зөвшөөрөл олгох журам энэ оны тавдугаар сарын 7-ны өдрийн 89 дүгээр тушаалаар шинэчлэгдэн батлагдсан.

      Ингэснээр өмнө нь 10 маягт бөглөдөг байсныг хөнгөвчилж дөрвөн маягт бөглөдөг болголоо. Бичиг баримт бүрдүүлэхэд чирэгдэл гаргахгүй байх үүднээс ингэж багасгасан. Бүрдүүлэх бичиг баримт их байх тусмаа хүндрэлтэй байх нь ойлгомжтой. Тиймээс зураг төсөл боловсруулах 24 ажилбарыг 18 болгож цөөрүүлсэн. Барилга угсралтын 24 ажилбарыг 18 болгосон.

Ингэж цөөрүүлсэн нь стандартад хэр нийцэж байгаа вэ?

      Ер нь суурь нөхцөл шаардлагад, барилга угсралтын ажилд стандарт байх ёстой гэж үздэг байсан. Үүнийг болиулж зарим нэг ажилбар дээр зөвлөх инженер заавал байна гэсэн заалтыг өөрчилж, мэргэжлийн инженер орлох боломжтой гэж үзсэн.

    Зураг төслийн тусгай зөвшөөрөлд зургийн техникч байх ёстой гэдэг байсан бол тусгайлан шаардахаа больсон. Гэхдээ тухайн компани зөвлөх инженертэй байж болно.

Тусгай зөвшөөрөл авах нөхцөл шаардлагыг багасгаснаар хэн дуртай нь барилга барих боломжтой болох нь ээ?

     Хэн ч тусгай зөвшөөрөл авч болно. Гэхдээ тусгай зөвшөөрлийн хамт хариуцлагатай байх гэрээ хийгддэг. Улиралд нэг удаа хийсэн ажлынх нь талаар тайлан авдаг. Энэ бол хариуцлагын гэрээ юм.

      Зөвхөн инженерийн орон тоог л баталж, тусгай зөвшөөрөл олгодог хэрэг үү. Кран, лифт, хогийн цэг хаана байрлах зэргийг харгалзаж үздэггүй юм уу?

       Манай хөгжлийн төв нь зайлшгүй шаардлагатай байх инженер техникчдийн ажилчдыг харгалзан үздэг. Шаардлагатай тохиолдолд тухайн компанийн ажлын талбай дээр очиж танилцдаг. Манайх угсралтын явцад хяналт хийдэг байгууллага биш. Бид барилга барих эрхийг нь олгодог.

Барилга барих зөвшөөрлийг юун дээр үндэслэж олгодгийг тодруулахгүй юу?

      Суурь нөхцөл, шаардлага хангасан аж ахуйн нэгжүүдэд зөвшөөрөл өгдөг. Тухайлбал, 16 давхар хүртэл барилга барих эрх авах бол барилгын гурван инженер, талбайн даамал, барилгын материал судлалын инженер, хөдөлмөрийн аюулгүй байдал, эрүүл ахуй хариуцсан инженер тус бүр нэг байх ёстой. Барилгын инженерүүдийн нэг нь мэргэшсэн зэрэгтэй байх шаардлагатай.

       Хөдөлмөр хамгааллын инженер нь барьж буй барилгын тооноос хамаараад хөдөлмөр хамгааллын албатай байна гэх үзүүлэлтүүдийг шаарддаг. Эдгээр шаардлагыг хангасан тохиолдолд тусгай зөвшөөрөл олгох ажлын хэсгийн хуралдаанаар орж, урьдчилсан дүгнэлт гарсны дагуу Засгийн газрын гишүүний шийдвэрээр олгодог.

Хөдөлмөр хамгааллын ажилчид хэд байх ёстой вэ. Хөдөлмөр хамгааллын ажилчдыг бас цомхотгосон уу?

Үгүй. Барьж буй барилгын тооноос хамаарах юм. Нэг барилга дээр нэг хөдөлмөр хамгааллын инженер заавал байна.

Орон нутагт барилга барих гэж байгаа бол заавал нийслэл рүү орж ирж зөвшөөрөл авах шаардлагатай юу?

     Барилгын ажлыг эхлүүлэх, үргэлжлүүлэх дүрэм журам гэж бий. Үүнийг гурван төрлийн ангилалд хуваасан байдаг. Тухайлбал, тухайн орон сууц нийслэл болон төвийн бүст хамаарсан бол нэгдүгээр ангилалд багтаж байгаа юм. Тус үйл ажиллагааг нь яамнаас шийдвэр гаргаж, тусгай зөвшөөрөл олгох эсэх нь батлагдана.

     Хөдөө орон нутгийн хувьд хоёрдугаар ангилалд хамаарагдаж, тухайн суурин газартаа шийдэгдээд явна. Харин гуравдугаар ангилалд хувийн эзэмшил багтсан. Эдгээр нь ажиллах нөхцлөө өөрсдөө шийдээд явна. Учир нь хувь хүн хашаандаа хоёр юмуу гурван давхар байшин барьж суух гэж байгаа бол аль болох чанарын стандартад нийцсэн, бат бөх барилга болох уу, үгүй юу гэдэг хувь хүнээс хамаарах юм.

Танайд тусгай зөвшөөрлийг цуцлах эрх бий юу?

      Өргөдөл гомдол ирвэл түүний дагуу тусгай зөвшөөрлийг нь цуцлах эрхтэй. Олгох, сунгах, түдгэлзүүлэх, хүчингүй болгох дүгнэлтийг бид гаргаж, улмаар Сайдын тушаалаар шийддэг.