Дулаалга, гадна ба доторзасал

Бид энэ дугаарт модон бүтээцийн угсралт дууссаны дараах механик холболтууд, дулаалга, гадна ба дотор заслын ажлын тухай нийтэлж байна.

Модон каркасан барилгад хүйтэн болон дулаан агаарыг тусгаарлаж байгаа бүх хана, хэсгүүдийг дулаална. R-17.8 дулаан дамжуулалтын эсэргүүцэл бүхий модон каркасан гадна ханын зүсэлтийн зургийг холбогдох материалын тухай доор харуулав.

(1) 

Модон каркасан барилгын дотор засалд гипсэн хавтанг хамгийн өргөн ашигладаг. Гипсэн хавтанг каркасанд ба босоо тулаас, хөндлөвчүүдэд эрэгдэж эсвэл хадаж тогтооно. Үүнээс өөр аргаар өнгөлгөө хийхээр болвол холбогдох стандарт, дүрмийг баримтална. Өнгөлгөөг нэг үеэр хадахад хадаасны алхам нь таазанд 180 мм-ээс, ханын босоо тулаасны хувьд 200 мм-ээс ихгүй байна. Ердийн гипсэн хавтанг угаалгын болон шүршүүрийн өрөөний тусгаарлагч хана гэх мэт

чийгшил ихтэй өрөөнд хийхийг хориглоно. Ийм өрөөнүүдийн хананд тусгайлан боловсруулсан ус чийгэнд тэсвэртэй ханын гипсэн хавтанг хэрэглэнэ.

(2)  Уур тусгаарлагч нь ханын дулаан, чийгтэй тал буюу уурын даралт өндөртэй хэсэгт байх барилгын хашлага хийцэд усны уур нэвтрэхээс хамгаалах үүрэгтэй полиэтилен цаас байна.

(3)  Дулаалгын хөвөн материалыг каркасын тулаас хооронд аль болох шахалгүй хийнэ.

-       Хаалга, цонх, механик холболтын эргэн тойрны зай завсарыг хөвөн дулаалгаар чигжих буюу хөөсөөр шүрших зэргээр битүүлнэ

. Агаар чийг тусгаарлагч цаас нь  модон араг бүтээцэд ус чийг нэвтрүүлэлгүй, агаарыг сэлгүүлэх зорилготой юм.

(4)  Гадна засал нь барилгад цас, ус нэвтрэхээс хамгаална. Өнгөлгөөг модон бамбай (OSB хавтан) дээр хийж барилгын агаар тусгаарлалтыг сайжруулдаг ба борооны усыг барилга руу нэвтрүүлдэггүй хамгаалалтын давхарга болдог.

Дээврийн болон адрын дулаалга, агаарын сэлгэлт

Хүйтэн цаг  агаартай газарт чийгшилтэй холбоотой хүндрэлүүд гардаг. Тухайлбал таазын дулаан тусгаарлагчаар алдагдаж байгаа дулааны алдагдал, нарны энергийн хамт дээврийн үндсэн хэсэг дээрх цасыг хайлуулдаг. Хайлсан цасны ус хөлддөг. Үүний улмаас ус, мөс хуримтлагдаж дээврээр нэвтрэн тааз хана руу орж болзошгүй.

Чийг нь адрын хөндийд цугларчхүйтний улиралд их хэмжээгээр конденсацид орж адрын хөндийд цан, хөлдөлт үүсэх, хөгц, ургацаг үүсэх, мод  ялзрах, металл холбоос зэврэх гэх мэт элдэв гэмтлийн эх үүсвэр болдог.Иймд дээврийг сайтар дулаалж, адрын хөндийн температурыг боломжийн хэмжээнд бага байлгах, адрын хөндийн агааржуулалтыг сайн хийх хэрэгтэй. Дээврийн хөндийд нэвтрэн орж буй чийгийг зайлуулах хамгийн зохистой арга бол агааржуулалт байдаг.

Төрөл бүрийн хэлбэрийн дээвэрт агааржуулалтын сувгийг янз бүрийн байдлаар гаргаж болох боловч уг сувгийг бүх талуудад аль болох жигд байрлуулах ба сувгийн нүхний 25-аас багагүй хувийг дээврийн дээд хэсэгт, мөн 25-аас багагүй хувийг доод хэсэгт байрлуулна. Сувгийн нүхийг төлөвлөхдөө бороо, цас, хортон, шавж нэвтрэхээргүй байх нөхцлийг бодолцох хэрэгтэй.  

Налуу ба хавтгай дээврийн алинд нь ч дулаалгын дээгүүр хангалттай агааржуулах орон зай байх нь чухал юм. Агааржуулалтын нүхийг дээврийн дээд хэсэгт, жишээ нь гол нуруу мөн дээврийн өнгийлтийн хормойд гаргана. Дээврийн өнгийлтийн хормойн нүх сүвээр нэвтрэх агаарын хөдөлгөөн голчлон салхинаас хамаарах бөгөөд хамгийн эрчимтэй үйлчилгээ үзүүлдэг.

45 м² байшингийн дулаалга, гадна ба дотор заслын материалын түүвэр

Нийтлэлийг боловсруулсан:

Төслийн удирдагч: Ц.Энхбаатар, доктор (Ph.D), дэд профессор 

Төслийн ажилтан: Б.Тодгэрэл