Нийслэлийн Удирдлагын зөвлөлийн ээлжит хуралдаанаар Улаанбаатар хотын Хөрсний усны өнөөгийн байдал, үүсч болзошгүй эрсдлийн тухай хэлэлцлээ.

           Улаанбаатар хотын Ерөнхий менежер Б.Бадрал Хөрсний усны өнөөгийн байдлын талаар Удирдлагын зөвлөлийн гишүүдэд танилцуулав.

        Улаанбаатар хот нь Туул гол болон түүний цутгал голуудын татам хэсэгт оршдог учраас хөрсний ус ихтэй. Гол мөрний усны түвшний өөрчлөлт, жилд унах хур тундасны хэмжээнээс шалтгаалан хөрсний усны түвшин үе үе дээшилдэг  гэдгийг мэргэжилтнүүд тогтоосон байна. Хотын зүүн хойд болон төв баруун хэсэгт хөрсний усны түвшин доошуулах 18,3 км урттай, 0.5-1,2м хүртэлх голчтой шугам сүлжээтэй боловч шугам сүлжээний трасс дээр барилга байгууламж барих, үзлэгийн худаг шугам сүлжээг хог шороогоор дүүргэх, хөрсний бүтэц, геологийн тогтоц өөрчлөгдөх зэргээс шалтгаалан хөрсний ус зайлуулах шугам сүлжээ эвдэрч,  хэвийн горимоор ажиллаж чадахгүй хэмжээнд хүрчээ.

         Захирагчийн ажлын албаны инженерийн байгууламжийн хэлтсээс хөрсний усны ус доошлуулах шугам сүлжээнүүдэд хэмжилт хийхэд 0,6-1,38 мм-ээр нэмэгдсэн нь тогтоогдсон байна. Хотын Ерөнхий менежерийн танилцуулснаар өнгөрсөн онд дулааны шугам сүлжээ, үзлэгийн худаг, барилга байгууламжийн подвальд хөрсний усны түвшин найман байршилд илэрсэн бол энэ онд 45 байршилд илэрчээ. Эдгээрээс 38 байршлын хөрсний усыг тогтоож, түвшинг бууруулах арга хэмжээг яаралтай авахгүй бол онцгой нөхцөл байдал үүсч болзошгүй хэмжээнд хүрсэн байна. Хөрсний усны түвшин нэмэгдэх нь  дулааны шугамын сүлжээний усны халуун 5-10 хэм буурах, инженерийн шугам сүлжээ гаднаасаа зэврэлтэд орох, барилга байгууламжийн суурь эвдрэлд орох, гэр хорооллын жорлон, хөрсний бохирдолтой холилдон газрын гүнд тархах, ундны усны эх үүсвэр бохирдох зэрэг сөрөг үр дагавартай учраас өвлийн ид ачааллаас өмнө яаралтай арга хэмжээ авах шаардлагатай байгааг хотын менежер онцоллоо.

         Одоогоор 100 айл, хотын төв хэсэг, 13-р хороолол орчмын хөрсний усны түвшин эрс дээшилсээр байгаа юм байна. Тухайлбал, Сүхбаатар дүүргийн нэгдсэн эмнэлгийн хашаа буюу хуучнаар хүүхдийн 2-р эмнэлгийн хашаанд ажилчдын байрны зориулалтаар орон сууц барих явцад хөрсний ус зайлуулах шугам сүлжээг гэмтээснээс хүндрэлтэй нөхцөл байдал үүсчээ.

Танилцуулгын дараа нийслэлийн Удирдлагын зөвлөлийн гишүүд, инженерийн байгууламжийн байгууллагуудын ажлын уялдаагүй, хариуцлагагүй байдлыг шүүмжлээд хүйтний улиралд хүндэрч болзошгүй нөхцөл байдал үүссэн тул эрсдэлээс хамгаалж, хөрсний усыг соруулах, хүн хүч,машин механизм,тоног төхөөрөмж ажиллуулах зэрэг зохион байгуулалтын арга хэмжээ авахыг даалгажээ.

Эхний ээлжинд нэн яаралтай хойд болон төвийн хэсгийн хөрсний ус зайлуулах шугам сүлжээний ачааллыг бууруулах, хөрсний усыг тогтмол түвшинд барихын тулд дунд голын хаалттай худаг, 100 айл орчимд Сэлбэ гол дээр 220 л/с хүчин чадалтай насос станц барихаар болжээ.  Энэхүү үйл ажиллагаанд шаардагдах хөрөнгийг Засаг даргын нөөцөөс гаргахаар Удирдлагын зөвлөлийн гишүүд шийдвэрлэсэн байна.