Өчигдөр  болсон ”Шинэчилж шийдье-222” хэлэлцүүлгээр орон нутагт өрнөж буй бүтээн байгуулалтын явц, орон сууцжуулах төлөвлөгөөний талаар ярилцлаа.

          Ховдчууд энэ жил анхны есөн давхар, цахилгаан шаттай орон сууцаа хүлээн авч, 600 гаруй машины зогсоол барьж дуусгажээ. Мөн 18 мянган га талбайд ногоон байгууламж барьж, он гарахаас өмнө битүү захаа нээх гэнэ. Энэ жил эхлүүлсэн ч он дамжин гүйцэтгэх ажлууд олон бий. Ирэх тавдугаар сард шинэ дулааны цахилгаан станцаа ашиглалтад оруулах бөгөөд456 айлын орон сууц барьж, 480 айлын хашааг жишиг хороолол болгон тохижуулж дуусгана гэлээ. Дулааны цахилгаан станц ашиглалтанд орволодоо ажиллаж буй 83 уурын зуухыг халж, 40 мянган хүн амтай Ховд хотод 120 мянган хүн амьдрахад ч дулаанаар хангах найдвартай эх үүсвэртэй болох ажээ.
            Өвөрхангай аймаг энэ жил хамгийн олон орон сууц ашиглалтад оруулсан байна. Энд шинээр 620 айлын орон сууц босчээ. Орон сууцны 1м.кв-ийн борлуулалтын үнэ ч боломжийн, нэг сая орчим төгрөг байгаа гэнэ. 2013 онд Арвайхээр сумын шинэ төвд орон сууцны хорооллын хэсэгчилсэн ерөнхий төлөвлөгөө боловсруулсан байна. Төлөвлөлтөд 3870 айлын орон сууц, сургуулийн 1, цэцэрлэгийн барилга 4, түүнчлэн төрийн захиргааны байр, багийн төв, өрхийн эмнэлэг, кино театр, судалгаа шинжилгээ болон худалдаа, үйлчилгээний төвүүд багтаахаар тусгажээ.

           Төв  аймгийнхан оны эхэнд ээрмэл утасны үйлдвэр нээж, үүндээ түшиглэн цаашид даавууны үйлдвэрлэл хөгжүүлэхээр зорьж байна. Одоо энд сурагчдын дүрэмт хувцасны оёдлын 2 үйлдвэр ажиллаж байгаа аж. Энэ онд ашиглалтад орсон Салхин парк, удахгүй босох “Их Майдар” цогцолбор, Хөшигийн хөндийн онгоцны буудал зэрэг бүтээн байгуулалтын цэг дээр байгаа энэ аймагт ирэх жилүүдэд 1000 айлын орон сууц барихаар төсөл төлөвлөлтөө гаргаж, эхний ээлжийн 128 айлын орон сууцны барилгын суурийн ажлыг эхлүүлжээ. Хот төлөвлөлтдөө Баруун-Уртын туршлагыг хэрэгжүүлж, одоогоор 94 өрхийн хашааг шинээр барьж байна. Сүүлийн 30-аад жилд засвар хийгдээгүй байсан орон сууцны 14 байрны гадна фасадыг бүрэн засварласан, “Зуунмод” кино театраа удахгүй нээх гэнэ.

             Баянхонгор аймагт энэ онд 520 айлын орон сууц, 43 айлын хаус шинээр ашиглалтад оржээ. Хөдөөгийн сумдын төсвийн байгууллагууд тус тусдаа галлагаатай, зардал ихтэй байгааг халахаар Шинэчлэлийн Засгийн газар улсын хэмжээнд 3 сумыг жишиг болгон шинээр барьж байгаагийн 2 нь тус аймгийнх. Сумын төвийг нэгдсэн инженерийн байгууламжтай болгож, орчин үеийн технологиудаар тохижуулж буй “Шинэ сумын төв”-үүдийг энэ ондоо багтаан хүлээн авахаар зорьж байгаагэлээ.

                 Харин Сүхбаатарчууд хот төлөвлөлтийн ажлаараа улсдаа жишиг болж байна. Иргэдийн амьжиргааны түвшинд тохируулан олон төрөл, хэлбэрийн орон сууц барьж, хашааны газрыг ч инженерийн байгууламжтай холбосон нь эдний гол ажил юм. Бага орлоготой иргэддээ зориулан хашааны жишиг хороолол барьж, үүнийгээ дэд бүтэцтэй холбосон бол дунд орлоготой иргэддээ 180 айлын нийтийн орон сууц барьж, харин чинээлэг өрхүүдэд 200 орчим хаус босгож ашиглалтад оруулжээ.