Нийслэлийн Удирдлагын зөвлөлийн ээлжит хуралдаанаар  “Баянгол дүүргийн Засаг даргын Тамгын газарт газар эзэмших эрх олгох тухай” асуудлыг хэлэлцжээ. Уг  асуудлыг нийслэлийн Засаг даргын Хот байгуулалт, хөрөнгө оруулалтын асуудал хариуцсан орлогч С.Очирбат танилцуулсан байна.
            “Нийслэлийн Засаг даргын 2012 оны А/63 тоот захирамжаар Баянгол дүүргийн Засаг даргын Тамгын газарт тус дүүргийн 4-р хорооны нутаг дэвсгэрт 1000мкв газрыг төрийн байгууллагын зориулалтаар эзэмшүүлж байгаа. Баянгол дүүргийн ЗДТГ байрлаж байгаа барилгын багтаамж, хүчин чадал хэтэрсэнээс харъяа хэлтэс, албад болох дүүргийн Онцгой байдлын алба, Боловсролын хэлтэс, Цэргийн штаб нь түрээсийн байранд, Соёлын хэлтэс, Худалдан авах ажиллагааны алба, Дотоодын аудитын алба, Нэг цонхны үйлчилгээний нэгж нь үйл ажиллагаа явуулах байргүй, Бүртгэлийн хэлтэс нь орон зайн хувьд хязгаарлагдмал, ажлын байрны шаардлага хангахгүй орчинд үйл ажиллагаагаа явуулж байна. Энэхүү хүндрэлтэй асуудлыг шийдвэрлэх зорилгоор одоо байрлаж байгаа конторын барилгын урд талд 1970мкв газарт Нутгийн удирдлагын ордны зориулалттай барилгыг авто машины зогсоол, гадна тохижилтын хамт барихаар төлөвлөсөн.  Одоогоор Нутгийн удирдлагын ордны зураг, төсвийг боловсруулахад 120 сая төгрөг төсөвлөсний дагуу зураг төсөл хийгдэж байна. Баянгол дүүргийн боловсролын хэлтэс, Ерөнхий боловсролын 38-р дунд сургууль хамаарагдаж байгааг холбогдох байгууллагуудтай зөвшилцөн тохиролцоонд хүрсэн. Баянгол дүүргийн иргэдэд төрийн үйлчилгээг төвлөрсөн байранд чирэгдэлгүй, хөнгөн шуурхай үзүүлэх боломж нөхцөлийг бүрдүүлэх үүднээс төрийн байгууллагын хэрэгцээнд Нутгийн удирдлагын ордны барилгыг барихад зориулан газрын асуудлыг шийдвэрлэх шаардлагатай байна” гэж танилцууллаа.
           Хуралдааны үеэр нийслэлийн Засаг даргын Экологи, ногоон хөгжлийн асуудал хариуцсан орлогч Т.Бат-Эрдэнэ "38-р дунд сургуультай зөвшилцсөн гэлээ. Сургуулийн барилгын асуудлыг хэрхэн шийдвэрлэхээр тохиролцсоныг" тодруулахад Баянгол дүүргийн Засаг дарга Д.Оросоо “38-р дунд сургуулийн барилгыг ашиглах боломжгүй гэж акталсан. Байрыг нь шинээр барих шаардлагатай байгаа. Тиймээс энэ асуудлыг давхар шийдвэрлэн дүүргийн Нутгийн захиргааны ордонтой зэрэгцүүлж 38-р сургуулийн байрыг шинээр өргөтгөн, сурагчдын багтаамжийг нь нэмж 640 хүүхдийн сургуулийн барилга барихаар төлөвлөсөн” гэж хэллээ. Нийслэлийн ИТХ-ын дарга Д.Баттулга газар эзэмших эрхээ аваагүй хэрнээ барилгын зураг төслийн ажил хийгдэж байгааг шүүмжилж, харилцан уялдаа холбоотой ажиллахыг анхааруулсан юм. Нийслэлийн Удирдлагын зөвлөлийн хуралдаанаас Баянгол дүүргийн Засаг даргын Тамгын газарт 1970мкв газрыг Нутгийн захиргааны ордон, 38-р сургуулийн барилгыг барихад эзэмшүүлэхээр шийдвэрлэжээ.