Өнгөрсөн долоо хоногийн “Бүтээн байгуулалтын цаг”-аар цементийн үнэ нэмэгдсэн шалтгаан, үнийн өсөлтийг хазаарлах боломжийн талаар Барилга, хот байгуулалтын яамнаас мэдээлэл сонссон. Гэтэл өнөөдрийг хүртэл цементийн үнэ буураагүй байгаа тул Ерөнхий сайд үнэ тогтворжуулах ямар арга хэмжээ авсныг холбогдох албаныхнаас тодрууллаа.

          Барилгын материалын үнэ тогтворжуулахаар Цемент импортлогчдын холбооны гишүүн 27 аж ахуйн нэгжид 127 тэрбум төгрөгийн зээл олгосон. Гэрээт байгууллагууд нэг тонн цементийн үнийг165 мянган төгрөгт багтаан барих үүрэг хүлээсэн ч өнөөдрийн байдлаар 220  мянгад хүрээд байна. Яам, хувийн хэвшлийнхэн цементийн үнэ нэмэгдсэн шалтгааныг энэ намар эрэлт огцом нэмэгдсэн, юанийн ханш өссөн зэрэгтэй холбож  тайлбарлав. Харин Ерөнхий сайд: “Хөнгөлөлттэй зээл авсан аж ахуйн нэгжүүд 14-хөн хоногийн цементийн нөөцтэй байгаа нь хангалтгүй үзүүлэлт, энэ жил барилгын материалын эрэлт хэрэгцээ огцом нэмэгдэнэ гэдгийг Засгийн газар урьдчилж тооцоод төсөв гарган, эргэлтийн зээл олгоод байхад барилгын ажлын улирал дуусах энэ үеэр салбарын яам, хувийн хэвшлийн аль аль нь хариуцлага алдлаа” гэж шүүмжлээд ийм тайлбараар буруу үйлдлээ зөвтгөж болохгүй гэдгийг хатуу анхаарууллаа.

                Гэр хорооллын дахин төлөвлөлт хийх 12 байршил дээр нэмж 8 байршилд төлөвлөлт хийхээр нийслэлийн удирдлагууд шийдвэрлэжээ. Энэ асуудлыг удахгүй Засгийн газрын хуралдаанаар хэлэлцүүлэх ажээ.

            Өнгөрсөн долоо хоногт Сүхбаатар аймагт 13 мвт хүчин чадалтай дулааны станц ашиглалтад орсон, энэ жилдээ багтаан Увс, Ховд, Хөвсгөл аймгийн дулааны станцууд ажиллаж эхэлнэ гэж Эрчим хүчний яамныхан танилцуулав. Дундговийг нийслэлтэй холбосон хатуу хучилттай авто замыг 11 дүгээр сарын 1 гэхэд хүлээж авах бөгөөд Дорнодын зам 55%, Хөвсгөлийнх 60%-тай үргэлжилж байна. Төмөр замын далангийн ажил өнгөрсөн долоо хоногт 9,8 км-ээр урагшилж, ажлын явц 42%-д хүрсэн. 11 дүгээр сарын эхэн хүртэл гүйцэтгэлийг 80 хувьд хүргээд энэ жилийн ажлыг зогсооно гэж Зам тээврийн яамнаас мэдээллээ.

         Өөрчилж шинэчлэхээр төлөвлөсөн 33 уулзвараас 18-ыг бүрэн дуусгаснаар энэ жилийн бүтээн байгуулалтыг хаана. Нэг уулзварыг 1-1,3 тэрбум төгрөгөөр засварлаж байгаа ч өргөтгөж шинэчилсний үр дүнд хэмнэх мөнгөө тооцож үзэхэд ганц жилийн дотор гаргасан зардлаа нөхөх ба эдийн засгийн бус олон ач холбогдол өгнө гэж “Гудамж” төслийнхөн тайлбарласан юм.

          Засгийн газрын тогтоолоор баталсан 9 төсөлд Хөгжлийн банк “Чингис” бондоос санхүүжилт олгох ёстой. Орон нутгийн авто замын төслүүдэд 590 тэрбум төгрөгийн санхүүжилт олгохоос 36%, нийслэлийн орон сууцны болон гэр хорооллын дэд бүтцийн төслүүдэд 198 тэрбум төгрөг олгохоос 26%-ийг гаргаад байна. Тавантолгойн ДЦС-ын барилгын ажилд 1,5 тэрбум, шинэ төмөр замын төсөлд 130 тэрбумыг олгосон, хөдөө аж ахуй, хөнгөн үйлдвэрийн төслүүдэд баталсан 270 тэрбум төгрөгөөс 30 тэрбум төгрөгийн гэрээ байгуулагдаад байна. "Гудамж" төсөл, Байшин үйлдвэрлэх комбинат, Төрийн орон сууцны корпорацийн санхүүжилт хуваарийн дагуу олгогдож байна. Эдгээр дээр нэмээд төмөрлөгийн үйлдвэр болон МИАТ-ийн дахин санхүүжилтэд зориулан “Чингис” бондоос хөрөнгө гаргах асуудлыг Засгийн газрын тогтоол гарангуут шийдвэрлэнэ гэж Хөгжлийн банкнаас мэдээллээ.