Япон-Монголын Барилгын салбарын бизнес форум 2013 оны 2 дугаар сарын 19-ний өдөр Токио хотын Гранд Плаза зочид буудлын хурлын танхимд болов.

Форумыг нээж  Японы газар, дэд бүтэц, тээврийн яам (MLIT)-ны Газрын эдийн засаг, барилга, инженерийн байгууламжийн газрын дарга Мотой Сасаки Дэд сайд Г.Байгалмаа, Монгол Улсаас Япон Улсад суугаа Онц бөгөөд, бүрэн эрхт Элчин сайд С.Хүрэлбаатар нар үг хэлсэн байна.

Дэд сайд Г.Байгалмаа Япон Улс, Монгол Улсын хооронд одоогоос 41 жилийн тэртээ дипломат харилцаа тогтоосноос хойш эдүгээ манай хоёр орны харилцаа улс төр, эдийн засгийн салбарт өргөжин хөгжиж ирсэн, өнгөрсөн хугацаанд Монголын дэд бүтэц, барилга, хот байгуулалтын салбарт Япон Улсын Хөгжлийн албан ёсны тусламжийн хүрээнд олон төслийг амжилттай хэрэгжүүлж ирснийг дурдаад, эдгээр тусламж дэмжлэгүүд нь Монгол Улсыг зах зээлийн эдийн засагт шилжих шилжилтийн хүнд үеийг даван туулж, хөгжлийнхөө өнөөгийн шатанд хүрэхэд ихээхэн хувь нэмэр оруулсан.

Монгол Улсын Шинэчлэлийн Засгийн газраас эдийн засгийн хөгжлийг хангах, тогтвортой өсөлтийг дэмжих зорилгоор дэд бүтэц, барилга, хот байгуулалтын чиглэлээр дэвшүүлэн, хэрэгжүүлэхээр ажиллаж буй зарим зорилтуудаас дурдаад тэдгээрийг хэрэгжүүлэхэд төр, хувийн хэвшлийн түншлэлийг шинэ шатанд гаргаж,  бизнест ээлтэй орчинг бүрдүүлэхэд Засгийн газраас онцгойлон анхаарч байгаа. Түүнчлэн дэд бүтэц, барилга, хот байгуулалтын салбарын хууль эрх зүйн орчинг боловсронгуй болгох чиглэлээр хийгдэж буй шинэчлэлүүд нь эдгээр салбаруудад гадаадын хөрөнгө оруулалтыг татах таатай нөхцлийг бүрдүүлэхэд чиглэгдэж байгаа гэж хэлжээ.

Монгол Улсаас Япон Улсад суугаа Онц бөгөөд, бүрэн эрхт Элчин сайд С.Хүрэлбаатар Монгол-Японы харилцааны 40 жилийн түүхэн хөгжлийг дүгнэж хэлсэн үгэндээ сүүлийн 20 жилд 2 Талын харилцаа амжилттай хөгжиж байна. Монгол Улс шинэ хөгжлийнхээ гараанд ирсэн, байгалийн баялгаа ашиглаж, түүнийгээ эдийн засгийн эргэлтэнд оруулж хөгжих зорилт тавьсан, түүнд шаардлагатай дэд бүтцийг байгуулах томоохон төслүүдийг хэрэгжүүлэхээр зорьж байгаа, үүнд барилгын салбарын бүтээн байгуулалт томоохон үүрэг гүйцэтгэнэ. Мэргэжилтэй ажилчдыг  бэлтгэх шаардлага тулгарч байгаа энэ цаг үед Японтой хамтарч ажиллах, Японы хөрөнгө оруулалтыг татах, технологийг нэвтрүүлэх асуудлаар болж буйгаараа энэхүү бизнес форум цаг үеэ олсон арга хэмжээ болж байна гэлээ.

Монгол Улсад барилгын шинэ технологи, хөрөнгө оруулалтаас гадна барилгын материалын үйлдвэрлэлийг хөгжүүлэх хэрэгцээ шаардлага байгаа. Энэ удаагийн бизнесийн форумаар мэргэжилтэй ажилчдыг бэлтгэх, сургах асуудалд онцгойлон анхаарахыг хүсэв. Хуучнаар Барилгын ТМС буюу мэргэжлийн сургалт үйлдвэрлэлийн төвүүдийг Японы ийм мэргэжил  сургалтын төвүүдийн зарчмаар зохион байгуулах, барилгыг шинэ технологиор хэрхэн барьж байгуулахыг сургадаг системийг Монголын сургуулиудад нэвтрүүлэх, Япон багш нарыг урьж ажиллуулах, Япон хэл зааж, улмаар Японд дадлагажигч ажилчнаар 2-3 жил ажиллуулах замаар гүнзгийрүүлэн сургаж дадлагажуулахад хамтарч ажиллах, ажил хэрэг болгохын төлөө ажиллахаа илэрхийлэв. 

 Дэд сайд Г.Байгалмаа “Монгол Улсын Барилга, хот байгуулалтын салбарын өнөөгийн байдал, цаашдын чиг хандлага”, Японы Газар, дэд бүтэц, тээврийн яамны Орон сууцны газрын Архитектурын хэлтсийн шинжээч Хасегава Хироюки, “Газар хөдлөлтөд тэсвэртэй барилгын хөгжил”, Нийслэлийн Засаг даргын Хот байгуулалт, хөрөнгө оруулалт хариуцсан орлогч дарга С.Очирбат С.Очирбат “Улаанбаатар хотод төлөвлөгдөж буй богино, дунд хугацааны хөтөлбөр”, БХТ-ийн дарга Б.Баярсайхан “Монголд Барилгын үйлдвэрлэл, үйлчилгээ эрхлэх тухай”, Рэскап ХОБ-ын Дэд ерөнхийлөгч О.Батнайрамал “Mongolia Introduction: World’s Fastest Growing Economy” сэдвээр тус тус илтгэл тавьж хэлэлцүүллээ.

Мөн Форумын дараа 2 талын ажил хэрэгч хүмүүс бизнесийн ганцаарчилсан уулзалт хийсэн байна.

Уг форумд оролцсон Монголын албан ёсны  төлөөлөгчдийг Барилга, хот байгуулалтын Дэд сайд Г.Байгалмаа ахалж, бүрэлдэхүүнд Монгол Улсын Ерөнхий сайдын зөвлөх М.Хүдэрбаатар, Нийслэлийн Засаг даргын Хот байгуулалт, хөрөнгө оруулалт хариуцсан орлогч дарга С.Очирбат, Барилгын хөгжлийн төвийн дарга Б.Баярсайхан, БХБЯ-ны Гадаад хамтын ажиллагааны хэлтсийн ахлах мэргэжилтэн Б.Баянтуул, Үйлдвэр, хөдөө аж ахуйн сайдын зөвлөх Б.Батноров, Нийслэлийн  Ерөнхий төлөвлөгөөний газрын Барилга, хот төлөвлөлтийн хэлтсийн Ахлах архитектор Ц.Хорлоо, БХТ-ийн Санхүүгийн хэлтсийн дарга Д.Содгэрэл, БХТ-ийн Сургалтын хэлтсийн дарга Г.Батнам нар оролцов. Мөн Монголын барилгын компани, аж ахуйн нэгжүүдийн төлөөлөл оролцлоо.