Газрын харилцаа, геодози, зураг зүйн газар 2013 оныг Газрын тухай мэдээллийг иргэдэд нээлттэй болгох жилээр зарласан байна. Газар өмчлөх, эзэмших, газартай холбоотой иргэдээс ирдэг түгээмэл асуултуудад олон нийтийн мэдээллийн хэрэгсэл, орчин үеийн цахим ертөнцийн ололтыг ашиглан мэдээ мэдээлэл түгээж байхаар болжээ. Тухайлбал, оны өмнө тус газар фейсбүүкт хуудастай болсон ба энэхүү хуудсаар дамжуулан газар, геодези, кадастрын цаг үеийн мэдээллийг мэдээлэхээс гадна, иргэдийн зүгээс ирж буй асуулт, санал гомдолд шуурхай хариулж үйлчилж байна. Мөн твиттер хаяг ажиллуулж эхэлснээр иргэдэд мэдээллийг нээлттэй, түргэн шуурхай өгөх дээр нэг шат ахисан үйл явдал болжээ. Тус газрын @gazriinkharilts богино хугацаанд олон жиргээчдийг дагуулсан ба одоогоор 40 гаруй асуулт, санал гомдолд хариулт өгөөд байгаа аж.