Нийслэлийн Ерөнхий төлөвлөгөөний газрын Хуулийн хэлтсийн дарга Э.Давааням: Барилгын ажил эхлүүлэх, үргэлжлүүлэх зөвшөөрлийг 3 хоногт багтаан олгож байна
-
Монгол Улсын Засгийн газрын 2012 оны 151 дүгээр тогтоолоор батлагдсан “Барилгын ажлыг эхлүүлэх, үргэлжлүүлэх, ашиглалтад оруулах дүрэм”-ийн талаар тодруулбал?
- Тус дүрмээр хөрөнгийн эх үүсвэр харгалзахгүйгээр шинээр барих, өргөтгөх, шинэчлэх, их засвар хийх, инженерийн хийцтэй бүх төрлийн барилга байгууламжийн ажлыг эхлүүлэх, үргэлжлүүлэх зөвшөөрөл олгох, барилга байгууламжийг ашиглалтад оруулахтай холбоотой харилцааг зохицуулсан. Гол онцлог нь баригдаж буй барилга байгууламжийн зөвшөөрөл олгох, ашиглалтад хүлээн авах үйл ажиллагааг аймаг, нийслэлийн мэргэжлийн байгууллагад нь шилжүүлсэн явдал юм. Мөн баригдаж буй барилга байгууламжийг 3 ангилж, зөвшөөрөл олгох, ашиглалтад хүлээн авах ажиллагааг богино хугацаанд шийдвэрлэх болгосноороо өмнө мөрдөгдөж байсан дүрмээс давуу талтай болсон.
- Барилга байгууламжийг эрсдэлийн түвшингээр 3 ангилсан. Энэ талаар тодруулахгүй юу?
- Тиймээ, энэ дүрмээр барилга байгууламжийг 3 ангилсан. Нэгдүгээр ангилалд 17-аас дээш давхар барилга байгууламж, эрчим хүчний эх үүсвэр, дулаан, цахилгаан дамжуулах сүлжээ, цэвэр, бохир усны шугам, төвлөрсөн цэвэрлэх байгууламж, үерийн ус зайлуулах байгууламжууд гэх мэт дүрэмд заасан бусад барилга байгууламжууд хамаарна. Эдгээр барилга байгууламжийн ажил эхлүүлэх, үргэлжлүүлэх зөвшөөрөл олгох, ашиглалтад оруулах үйл ажиллагааг Барилга, хот байгуулалтын яам хариуцан зохион байгуулна. Хоёрдугаар ангилалд 17 давхар хүртэлх үйлдвэр, иргэний барилга байгууламж, дулаан, цахилгаан эрчим хүч түгээх сүлжээ, цэвэр, бохир усны шугам, орон нутгийн чанартай авто зам гэх мэт барилга байгууламж хамаарч байгаа бөгөөд ажил эхлүүлэх, үргэлжлүүлэх зөвшөөрөл олгох, ашиглалтад оруулах үйл ажиллагааг аймаг, нийслэлийн Засаг даргын Тамгын газрын харъяа барилгын асуудал эрхэлсэн агентлаг хариуцан зохион байгуулна. Гуравдугаар ангилалд Инженерийн хангамж нь өөрийн эх үүсвэртэй 2 давхар хүртэл, 3600м3 хүртэл эзлэхүүнтэй иргэний барилга болон амины орон сууц барих иргэн, хуулийн этгээд ажил эхлүүлэх зөвшөөрөл авах шаардлагагүй.
- Иргэн, хуулийн этгээд барилга барих тохиолдолд хаана хандаж, зөвшөөрөл авах вэ?
- Иргэн, хуулийн этгээд барилга барих тохиолдолд хаана хандаж, зөвшөөрөл авах вэ?
- Иргэн, хуулийн этгээд нь өөрийн эзэмшлийн газар дээрээ барилга барих хүсэлтээ нийслэлийн засаг захиргааны II байр буюу Хангарьд ордны нэгдүгээр давхарт байрлах Нэг цэгийн үйлчилгээгээр дамжуулан нийслэлийн Ерөнхий төлөвлөгөөний газарт гаргана. Тус газраас иргэн, хуулийн этгээдийн хүсэлтийг хүлээн авч, шийдвэрлэх боломжтой эсэх талаарх хариуг 14 хоногийн дотор өгнө. Зөвшөөрсөн тохиолдолд иргэн, хуулийн этгээд нь архитектур төлөвлөлтийн даалгаврын дагуу эскиз зургаа боловсруулж, Ерөнхий архитектораар батлуулна. Ингэснээр барилга барих зөвшөөрөл тухайн хүнд олгогдлоо гэж ойлгож болно. Иргэн, хуулийн этгээд нь техникийн нөхцөлүүдээ холбогдох газруудаас авч, барилгын зураг төсөлд магадлал хийлгэж, холбогдох баримт бичгийг бүрдүүлсний дараа барилгын ажлыг эхлүүлэх хүсэлтийг манай байгууллагад гаргах ба Хот байгуулалт, дэд бүтцийн хяналтын албанаас барилгын ажлыг эхлүүлэх үргэлжлүүлэх зөвшөөрлийг 3 хоногт багтаан олгож байна.
- Барилгын ажил эхлүүлэх, үргэлжлүүлэх зөвшөөрөл авах иргэн, хуулийн этгээд ямар материал бүрдүүлж өгөх вэ?
- Барилгын ажил эхлүүлэх, үргэлжлүүлэх зөвшөөрөл авах иргэн, хуулийн этгээд нь дор дурьдсан материалыг бүрдүүлэх ёстой.
· Зөвшөөрөл олгохыг хүссэн өргөдөл,
· Барилгын ажил үйлчилгээ эрхлэх тусгай зөвшөөрлийн гэрчилгээ
· Барилга байгууламжийн магадлал хийгдсэн зураг төсөл
· Инженер техникийн ажилтныг томилсон шийдвэр
· Захиалагчийн техникийн хяналт гүйцэтгэх болон зохиогчийн хяналт хийх гэрээ
· Барилга байгууламжийн угсралтын ажил гүйцэтгэх гэрээ
· Барилгын талбайн зохион байгуулалтын зураг болон хөдөлмөрийн аюулгүй байдал болон эрүүл ахуйн үйл ажиллагааны ажил гүйцэтгэх төслийн баримт бичгийг бүрдүүлэх шаардлагатай.
- Барилгын ажлыг үргэлжлүүлэх зөвшөөрлийг ямар тохиолдолд олгодог вэ?
- Барилгын ажлыг эхлүүлэх зөвшөөрөл олгосноос хойш 1 жилийн хугацаанд ажил нь эхлээгүй бол хууль хяналтын байгууллагын шийдвэр, мэргэжлийн хяналтын байгууллагын дүгнэлт, зөвлөх үйлчилгээ эрхлэгчийн шийдвэрийн дагуу үйл ажиллагааг 1 сараас дээш хугацаагаар зогсоодог. Барилгын ажил зогсоох болсон шалтгаан, зөрчил дутагдлыг арилгасан талаар барилгын үйл ажиллагааг зогсоосон байгууллагын шийдвэр, дүгнэлтийг үндэслэн ажил үргэлжлүүлэх зөвшөөрлийг мөн 3 хоногт багтаан олгоно.
- Барилга байгууламжийг ашиглалтад оруулах талаар дүрэмд ямар зохицуулалт хийгдсэн бэ?
- Барилга байгууламж барьсан иргэн, хуулийн этгээд нь барилга байгууламжийг ашиглалтад оруулах комисс ажиллуулах хүсэлтийг Нэг цэгийн үйлчилгээгээр дамжуулан нийслэлийн Ерөнхий төлөвлөгөөний газарт гаргана. Иргэн, хуулийн этгээдээс бүрдүүлж ирэх баримт бичгийн жагсаалтыг манай байгууллагын цахим хуудсанд байршуулсан байгаа. Тус газрын Хот байгуулалт дэд бүтцийн хяналтын алба нь ирүүлсэн баримт бичгийн бүрдлийг хянаж, шаардлага хангасан барилга байгууламжид комисс ажиллуулах хуваарийг гарган ажиллаж байна. Комисс ажиллах хуваарийг байгууллагын цахим хуудсанд байршуулсан байгаа. Барилга байгууламжийг ашиглалтад оруулах комиссын үйл ажиллагааг нийт 14 хоногийн хугацаанд багтаан ажиллаж байна.
- Ямар тохиолдолд ашиглалтад оруулах комисс барилгыг хүлээн авах ажлыг хойшлуулдаг вэ?
- Тухайн барилга байгууламж нь хууль тогтоомж, норм, дүрмийн заалт, стандартын шаардлага зөрчсөн бол комисс ажиллахыг тодорхой хугацаагаар хойшлуулах, ноцтой зөрчил илэрсэн тохиолдолд холбогдох байгууллагаар шалгуулж шийдвэрлүүлэх ажиллагаа хийгдэнэ. Комиссын гишүүд хариуцсан мэргэжлийнхээ чиглэлээр илэрсэн зөрчил дутагдлыг бүрэн арилгуулсны дараа актад гарын үсэг зурдаг. Барилга байгууламжийг ашиглалтад оруулж байгаа иргэн, хуулийн этгээд нь зөрчил дутагдлыг 14 хоногт бүрэн арилгасан байх ёстой. Хэрэв уг хугацаанд зөрчлөө арилгаагүй тохиолдолд комисс дахин ажиллана.