“Барилга экспо 2013” үзэсгэлэн маргааш эхэлнэ
Маргааш 12 цагаас Мишээл төвд “Барилга экспо 2013” олон улсын үзэсгэлэн яармагийн нээлт болно.
Энэхүү үзэсгэлэнгийн зорилго нь Монгол улсын барилга, хот байгуулалтын салбарт шинэ бүтээгдэхүүн, дэвшилтэт техник технологи нэвтрүүлэх, мөн иргэдэд шинэ орон сууц, амины орон сууцны мэдээллийг хүргэх гэх мэт олон талт эрэлт хэрэгцээг хангах, бизнес эрхлэгчдийн хамтын ажиллагаа, зах зээлийг өргөжүүлэхэд оршдог.
Хэн оролцож байгаа вэ?
· Төрийн байгууллагууд \ Барилга хот байгуулалтын яам, Татварын Ерөнхий газар, Гаалийн Ерөнхий газар, Стандарт хэмжил зүйн газар, УБТЗ, МҮХАҮТ\
· Мэргэжлийн ТББ-ууд \ БХҮНТ, БЗТЗХ, МБМҮХ, МБИХ, БХЦҮХ\
·Барилга, барилгын материалын салбарын Үндэсний томоохон үйлдвэрлэл, худалдааны компаниуд
· Дэлхийд алдартай барилгын материалын брэнд, дэвшилтэт технологийн үйлдвэрлэгчид
Хэрхэн зохион байгуулах вэ?
Энэ удаагийн үзэсгэлэнг иргэдийн хэрэгцээ шаардлагад тулгуурлан “Барилгын материал, дэвшилтэт технологийн үзэсгэлэн”, “Шинэ орон сууц, ҮХХ-ийн үзэсгэлэн” гэсэн хоёр хэсэгт хуваан зохион байгуулж байгаа билээ. Үзэсгэлэнгийн нэгдүгээр хэсэг буюу “Барилгын материал, дэвшилтэт технологийн үзэсгэлэн” 5 дугаар сарын 3-аас 6-ны хооронд зохиогдох бөгөөд үүнд барилгын материал, тоног төхөөрөмж, машин механизм, холбоо дохиолол, цахилгаан тоноглолын үйлдвэрлэл, худалдаа импорт эрхэлдэг аж ахуйн нэгж, байгууллагууд оролцоно.
Хоёрдугаар хэсэг буюу “Шинэ орон сууц, ҮХХ-ийн үзэсгэлэн” энэ сарын 10-аас 13-ы өдрүүдэд болох бөгөөд эндээс шинэ орон сууц, амины орон сууц, орон сууцны хөнгөлөлттэй зээл, барилгын зураг төсөл, төсөв, интерьер, ландшафт тохижилтын талаарх мэдээллийг авах боломжтой.
“Барилга экспо 2013” үзэсгэлэн яармагийн онцлог юу вэ?
1. Засгийн газраас барилгын салбарыг дэмжих, хүн амын орон сууцны эрэлт хэрэгцээг хангах зорилгоор хэрэгжүүлж байгаа төсөл хөтөлбөрийн талаарх нэгдсэн мэдээллийг олон нийтэд танилцуулна.
2. 2013 онд шинээр баригдах, ашиглалтанд орох орон сууцны үнэ ханшийг зарлана.
3. Барилгын материал, Дэвшилтэт технологийн үзэсгэлэнд ЗГ-аас хэрэгжүүлж байгаа хөтөлбөрт хамрагдсан үйлдвэрлэгч, импортлогч компаниуд оролцож байгаа бөгөөд БХБЯ-тай байгуулсан гэрээний дагуу барилгын материалуудаа хямдралтай үнээр худалдаална.
4. Солонгосын дулааны шугам сүлжээ корпораци, “ЛИАО” брэнд, Өнгө чанарыг тодорхойлогч Японы “Кансей пейнт” брэнд, Sem System Co.,LTD, Samyang valve Co.,LTD , Taibong industries Co.,LTD , Daebo Paint Co.,LTD, Beijing DuoWei EISPT international Project Technology Co.,LTD, БНБ Корпорайшн ХХК, гэх мэт дэлхийд барилгын салбараар тэргүүлэгч Тайланд, Тайвань, Солонгос, Щвейцарь, Итали, Орос, Герман, Финлянд, Вьетнам зэрэг 10 орны 1000 гаруй нэр төрлийн барилгын материал, бүтээгдэхүүн, дэвшилтэт техник технологи, шилдэг брэндүүдтэй танилцах боломжийг олгоно.
5. Digital-21 орон сууц, “Монгол Нью Пластик ХХК”, “Инженер Геодези ХХК”, Пирамид Индастри ХХК, Төмөрт Транс ХХК, Ган хийц ХК, Рилмайк ХХК, шилэн хийц ХХК, Бау Хаус ХХК, Сопрема ХХК, Клаймакс Интернэшнл зэрэг барилгын материал үйлдвэрлэгч, импортлогч болон барилга угсралт, барилгын засал чимэглэлийн шилдэг 250 гаруй аж ахуйн нэгж, компаниудын бүтээгдэхүүн, үйлчилгээтэй танилцаж, урамшуулал хүртэж азтан болох боломжтой.
Үзэсгэлэнгийн хөтөлбөрөөс:
5 сарын 3
12:00 цагт Нээлтийн үйл ажиллагаа
5 сарын 4
10:00 цагт “Барилгын ханган нийлүүлэгчдийн уулзалт”
5 сарын 5
11:00 цагт “Барилгын материал үйлдвэрлэгчдийн өдөрлөг”
("Барилга Экспо 2012" үзэсгэлэнгийн архиваас)
