“Барилга экспо 2013” нээлтээ хийлээ
Мишээл төвийн үзэсгэлэнгийн зааланд дотоод, гадаадын олон үзэгчид цугларчээ.
Үзэсгэлэнг нээж Барилга Хот Байгуулалтын сайд Ц.Баярсайхан, “Барилга экспо 2013” олон улсын үзэсгэлэнгийн Зохион байгуулах хорооны дарга Г.Батсүх үг хэллээ.
Барилга, хот байгуулалтын сайд Ц.Баярсайхан: “БХБЯам энэхүү үзэсгэлэнг байнга дэмжиж хамтран зохион байгуулагчаар оролцдог. Энэ арга хэмжээ нь дэлхийн сүүлийн үеийн дэвшилтэт техник технологи, шилдэг барилгын материалыг Монголд нэвтрүүлэх, улмаар дэвшилтэт технологиор чанартай орчин үеийн барилга орон сууц барих, барилгын бизнес эрхлэгчдийн гадаад, дотоод харилцааг өргөжүүлэх боломжийг бүрдүүлж өгдгөөрөө онцлог. Засгийн газраас барилга, барилгын материалын салбарыг дэмжих зорилгоор төсөл хөтөлбөрүүдийг баталж хэрэгжүүлээд байна. Үүний хүрээнд барилгын материал үйлдвэрлэгч, импортлогч, барилгын компаниудад, иргэдэд хөнгөлөлттэй зээл олгохоор болсон. Энэ ажлыг тус үзэсгэлэнгээр дамжуулан олон нийтэд сурталчилан танилцуулах ажлыг зохиож байгааг хэлэх хэрэгтэй...” гэлээ.
Г.Батсүх: “Бидний өнөөдөр энд цугласан шалтгаан гэвэл Монгол орны бүтээн байгуулалтын салбарт хөгжил дэвшлийг авчирах явдал юм. Бидний хамтын ажиллагаа зөвхөн өнөөдрийн үзэсгэлэнгээр дуусах ёсгүй. Цаашид дэлхийн олон орны шилдэг бүтээн байгуулагчидтай холбоо тогтоон, дэлхийн хөгжилтэй хөл нийлүүлэн алхахын төлөө, дотоодын үйлдвэр эрхлэгч, импортлогчид маань гадаад оронд өөрийн орны брэндээр гайхуулахын төлөө, Монгол улсаа улам бүр цэцэглүүлэн хөгжүүлэхийн төлөө хамтдаа хичээцгээе...”
Үзэсгэлэнгийн нээлтийн үйл ажиллагаанд салбарын Төрийн болон ТББ-уудын дарга удирдлагууд болон үзэсгэлэнгийн Ерөнхий ивээн тэтгэгчээр оролцож байгаа Солонгосын дулааны шугам сүлжээний корпорацийн Санхүүгийн бодлогын хэрэгжилтийн дарга Со Бунг Гён, Японы “Кansai paint” брэндийн үйлдвэрлэгч “Fuji exim Co.,LTD”-ийн дэд ерөнхийлөгч захирал Дики Хоё нар хүрэлцэн ирж мэндчилгээ дэвшүүллээ.
Мөн үзэсгэлэнгийн нээлтийн ёслолд Жонон хамтлаг хүрэлцэн ирж ардын урлагийг амьд хөгжимтэй хослуулан хүргэсэн. Үзэсгэлэнд хүрэлцэн ирсэн төрийн болон төрийн бус байгууллагын хүндэт төлөөлөгчид хүндэтгэлийн тууз хайчилснаар энэ сарын 6-ыг дуустал үргэлжлэх “Барилга экспо 2013” үзэсгэлэн албан ёсоор нээлтээ хийлээ.
