Дэлхийн хамгийн үнэтэй хотоор шалгарч байсан Хонг Конгод ажлын байрны түрээсийн төлбөр ирэх 2 жилийн хугацаанд 40%-иар буурч магадгүй байгаа нь Хятад улсын эдийн засаг “хатуу газардаж” эхлэхийн дохио гэж “Barclays Capital Research” компаниас мэдээлжээ. Худалдан авах чадварыг 2013 онд 8-аас илүү хувиар өсөх ч дэлхийн санхүүгийн хямралын нөлөөгөөр хатуу газардалт болно гэж “Barclays”-гийн Хонг Конг дахь салбарын шинжээч Эндрью Лауренс, Вивиэн Чан нар ирүүлсэн мэдээндээ дурджээ. Хятадын эдийн засаг “зөөлөн газардахад” түрээсийн үнэ 10-15%-иар буурч магадгүй гэнэ.

      Дэлхийн хэмжээний санхүүгийн фирмүүд АНУ-ын эдийн засгийн өсөлт зогсонги байдалд орж, Европийг бүхэлд нь бүрхсэн засгийн газрын өрийн хямралтай холбогдуулан өргөн хэрэглээний барааны үнэд илүү анхаарал тавих болсон ч компаниуд энэ жил 120,000-аас илүү ажлын байрны цомхотгол хийнэ хэмээн зарласан. Өчигдөр “Deutsche Bank AG” болон “UBS AG” банкууд жилийн орлогын хэмжээ буурна гэсэн тооцоог хийсний үндсэн дээр ажлын байрны цомхотголоо нэмэгдүүлэхээр болсон тухай зарлажээ.

        “Ажлын байрны түрээсийн ханшийг түрээслүүлэгч тал тогтоохдоо үл хөдлөх хөрөнгийн ханшийг харгалзан үзэж байгаа. Зарим түрээслүүлэгчид түрээсийн үнэд гадаад талбайн ашиглалтыг давхар тооцож байгаа нь эдийн засгийн цаашдын төлөв доройтож буйг харуулж байна” гэж тэд захидалдаа бичжээ. Түрээслүүлэгчид байрны түрээсийн хөлсөө нэмэхийг олон янзаар хичээж байгаа ч сүүлийн хагас жилд үнэ буурах хандлага хүчтэй хэвээр байна. Түүнчлэн ихэнх байрнуудын борлуулах үнэ өмнөхөөсөө нилээн доогуур байгаа нь түрээсийн үнийн тарифид нөлөөлж байна гэж шинжээч нар үзжээ.

Дээд зэрэглэлийн оффисын түрээсийн төлбөр

Хонг Конг дахь дээд зэрэглэлийн офисын түрээсийн төлбөр 2009 оны 6 сараас хойш 60%-иар өссөн нь жирийн компаниудаас илүү санхүүгийн үйлчилгээ эрхлэдэг компаниуд түрээслэдэг байсантай холбоотой. Түүнчлэн Хонг Конг дахь А зэрэглэлийн оффисын байрны түрээсийн төлбөр энэ оны 6 сард 1м² нь 213.7 ам.доллартай тэнцэж байсан нь дэлхий дээрх хамгийн үнэтэй түрээс гэж нэрлэгдэхэд хүргэсэн. Хонг Конг дахь худалдан авах чадварын түвшин саяхан 4.8 орчим хувьтай байсан бол “урт хугацаат дундаж” ханш 6.8 орчим хувьтай байгаа тухай “Barclays”-гаас мэдээлжээ.

Дээд зэрэглэлийн оффисын байрны дундаж талбайн хэмжээ 3.7 сая м2 байдаг бол энэ жилээс 2014 он хүртэл дахин нэмэгдэж магадгүй байна. Харин 1987 оноос хойш түрээсийн талбайн нийт хэмжээ дунджаар 2.4 сая м² байсан. “Маш цөөхөн түрээслүүлэгчид ажлын байрны түрээсийн үнийг бууруулах ёстой гэдгийг ойлгож байгаа. Гэсэн ч зах зээлийн төвөгтэй байдал тэднийг олсон ашигтаа сэтгэл хангалуун байж чадахгүй байгааг харуулж байна” гэж “Barclays” мэдээндээ дурьдав.

                                                                Орчуулсан: Тэрбумтан /www.business news.mn/