Өнөөдөр болсон нийслэлийн удирдлагын зөвлөлийн ээлжит хуралдаанаар Ахмадын хотхоны төслийг хэлэлцлээ.  Уг ахмадын хотхон нь нийслэлийн өмч байх бөгөөд хувийн эзэмшилд өмчлүүлэхгүй гэнэ. Энэхүү төсөлд хамрагдах ахмадууд нь нийслэлийн иргэн байх, улсаас орон сууц авч байгаагүй, орон сууцанд амьдрах ашиглалтын зардлаа төлөх чадвартай байх зэрэг ерөнхий нөхцөлийг хангасан байх бөгөөд тэтгэврийн насны буюу гэр хорооллын орчинд амьдрах чадваргүй,  тахир дутуу, гал усны аюул гэх мэт байгалийн давагдашгүй хүчин зүйлд нэрвэгдсэн иргэд мөн хамрагдах боломжтой аж.
       Энэхүү хотхоны хөрөнгийн эх үүсвэрийг “дэмжлэгийн сан” байгуулж шийдвэрлэхээр төсөлд тусгажээ. Ахмадын хотхоныг эхний ээлжинд Зайсан орчимд болон Хан-Уул дүүргийн нутаг дэвсгэрт эрүүл цэнгэг агаарт байгуулахаар гурван байршлыг сонгосон байна. Ахмадын хотхоны төсөл батлагдвал 2013-2016 оны хооронд барьж байгуулах юм.
         Уг төслийн талаар Нийслэлийн засаг дарга бөгөөд Улаанбаатар хотын захирагч Э.Бат-Үүл саналаа хэлэхдээ иргэдийг хамруулах журмыг нарийвчлан тусгаж өгөх шаардлагатай гээд ахмадууд өөрсдөө сууна гэж орсон ч үр хүүхэддээ өвлүүлж өгөх, мөн гачигдалтай иргэдийн тоонд залуу хүмүүс багтаж орох магадлалтай зэргийг сануулсан.  Түүнчлэн  байрны түрээс бага байгааг шүүмжлээд, зөвхөн ашиглалтын зардлаа төлөөд амьдрах боломжтой учир энэ байранд хүн бүр орохыг хүсч зорилтот бүлэгтээ хүрч чадахгүй байх гэсэн болгоомжлол төрж байна гэлээ.
Эдгээр асуудлыг сайтар нягталж шалгаад дахин нарийвчлан боловсруулсны эцэст  ИТХ-аар хэлэлцэж батлахаар боллоо.