Баянзүрх дүүргийн нутаг дэвсгэр дэх Зүүн дөрвөн замаас Чулуун овоо хүртэлх замыг өнгөрсөн даваа гарагаас эхлэн засварлаж байгаа билээ.

"Шинэ бүтээн байгуулалт" хөтөлбөрийн хүрээнд энэхүү 4.5 километр замыг бүрэн шинэчлэхээр болсон байна. Аль 1986 оноос хойш энд шинэчлэлтийн ажил огт хийгдээгүй аж.

Ямартай ч замын ажил ирэх оны наймдугаар сарын 31 хүртэл үргэлжлэх юм. Ингэхдээ замыг хэсэгчлэн хааж, шат дараатай засварлах юм. Зам барилгын ажлыг өвлийн улиралд түр зогсооно.

Түүнчлэн түгжрэлийг багасгахын тулд Офицеруудын замыг гурван эгнээтэй болгож, замын дундах ногоон байгууламж, явган хүний замыг ч бас шинэчлэх аж. Мөн энэ хавиас ойролцоогоор 40-өөд дэлгүүр, павильоныг нүүлгэх тооцоо гарчээ./top.mn/