Аливаа зүйлийн мууг нь биш сайныг нь эхэлж харж сур гэж эмээ маань үргэлж захидаг байж билээ.

        Барилгын салбар гэж ярихаараа хүмүүс дандаа л тааруу юм ярих юм. Барилгын чанар муудаж байна, байрны үнэ нэмэгдэж байна, гишгэх газар минь барилгаар солигдож, гэмгүй царайлсан хятад ажилчид  эх орныг минь эзлэх гэж байна гээд л  өчнөөн олон тааруу зүйл ярих юм. Энэ талаар ярих нь ч зөв, бичих нь ч зөв. Харин би энэ удаад барилгын салбарын сайныг олж харахаар шийдлээ.
        Монгол Улсын тэргүүлэх салбар нь уул уурхай, хөдөө аж ахуй, барилгын  салбар гэдгийн хүмүүс бүгд хүлээн зөвөөрнө.  Хэдхэн жилийн өмнө энэ жагсаалт огт өөр байсан. Барилгын чиглэлээр суралцах оюутан тэр бүр байдаггүй байлаа. Барилга гэж бодохоор л хүнд хүчир, шороо тоостой зууралдсан ажил гэж бүдүүн барагаар ойлгодог байж. Гэтэл одоо эрэгтэй, эмэгтэйгүй барилгын мэргэжил эзэмших гэж хичээж,  бүүр гадаад явж  суралцаж, шилдэг шийдэл, шинэ санааг монголдоо нэвтрүүлэх чадварлаг инженер, архитекторууд төгсөн ирж байна. Мэдлэг боловсролыг ч өндрөөр үнэлэх чадамжтай салбар юм.Улсын болон хувийн их дээд сургуулиуд уул уурхай, барилгын инженерийн ангийг шинээр нээж, үйл ажиллагаа нь зогсох шахсан МСҮТ-үүд   үүд хаалгаа нээж, энэ төрлийн мэргжилтнүүдийг ихээр бэлтгэх болж.
               “Бурхан хүнийг бүтээгээд, бусдыг нь инженер  бүтээсэн” гэх  хошин яриаг та хаа нэгтээ, хэн нэгнээс сонсож байсан байх. Энэ үгийг би анх сонсохдоо учиргүй  инээж, яагаад заавал инженер гэж  асуусан байсан юм. Харин одоо хүлээн зөвшөөрдөг. Үнэхээр л инженер хүний бурхан ухаан, этгээд сонин шийдлүүдээр энэ ертөнц хөгжин дэвждэгийг харж байна. Хэрэв хэн нэгэн аливаа зүйлийг  өвөрмөцөөр сэтгэж, өөр өнцгөөс нь хардаггүй бол энэ ертөнц яасан уйтгартай.
               Нийслэл хот өдөр ирэх тусам өнгө засч, өндөр өндөр барилгууд баригдаж  байна. Барилгын материалыг монголдоо үйлдвэрлэж эхэллээ. Интерер дизайны хувьд илүү их мэдрэмжтэй болж. Дэлхийн улс орнуудтай техник технологи, мэргэжилтнүүдээрээ эн зэрэгцэн алхаж байна. Хэзээ л монголд ийм их барилгын компани байлаа, хэзээ л барилгын салбар ийм олон хүнийг ажлын байраар хангаж, нийгмийн хүндийг үүрэлцэж байлаа гэж бодохоор муулахаасаа илүү сайлмаар. 
Ингэж л  “нүүдэлчин” гэх тодотголтой миний монголд барилгын салбар тэргүүлэх болтлоо хөгжсөн байна. Энийг бид харах ёстой. Үүнийг бид үнэлэх хэрэгтэй. 
                                                                                                                                                                                            

                                                                                                                                                                                          Л.Мөнхчимэг