Та минь ээ. Замын  түгжрээ   20 хувиар багасаж “овоо доо”, “Браво” гэж хэлэх  зүйл нэгээр нэмэгдлээ. Энэ дүрэм батлагдахад  ихэнх хүмүүс үл ойшоож,  би  XXI- р зуунд,  ардчилсан нийгэмд амьдарч байна. Тэгж  эрх чөлөөгөө боогдуулж чадахгүй гэж ярих хүн  ч байсан.

                Наймдугаар сарын 27-ноос мөрдөж эхэлсэн энэ дүрэм өдгөө зургаан хоног болоход  замын түгжрэл дээрхи хувиар буурч,  том бага, дарга сайдгүй мөрдөж байгаа нь манайхан  ухамсараа уландаа гишгээгүй гэдгийг харууллаа.  Хаа сайгүй цагдаа нар, хяналтын, энгэрийн  камер  гээд хот тэр аяараа хяналтын төхөөрөмжөөр бүрэн тоноглогдсон нь дээрх дэвшлийг авчирсан ч гэх.  Явган хүмүүс хөдөлгөөнд оролцохдоо хээр талд, зэлүүд газар дураараа бэлчилж яваа мал аятай л байдаг нь дүрэм журамдаа шилжиж соёл гэгчийг харуулж байна.   

           “Буурай орноос бусдын жишигт хүрсэн хот” гэх Сингапурын тухай өгүүлсэн номыг манай эрх мэдэлтнүүд  дамжуулан уншиж, дэрлэж хонон нандигнадаг гэнэ лээ. Уншсан номных  нь үр ашиг одоо л гарах гэж байгаа бололтой.  Нутаг дэвсгэр багатай, хүн амынхаа тоогоор манайхаас илүүрхээд шалихгүй тус орон ” хүүе” гэхийн зуургүй  хөгжлийн түвшинд хүрсэн нь ердөө л сахилга бат, хариуцлага өндөртэйд байсан гэж ярьдаг.  Наад зах нь олон нийтийн газар бохь зажиллаа гэж торгодог уг орныг бусад улс орнууд тохуурхан “асрагч засгийн газартай” гэж  хэлж, ярьж байсан. Гэвч одоо бүгд л Сингапураас суралцаж байна.  

Гэмт хэргийн тоогоороо Сингапур дэлхийд сүүлээр  ордог хэдий ч шийтгэл, цаазын ялаараа дээгүүр ордог. Бага зардалтай хүн баяждаг гэх дүрмийг Сингапур бас баримталж чадсан орон.  Тэрнээс манайх шиг  сар бүр хэдэн мянган оюутнуудыг шоуны  мөнгөөр нь хангаж, хаясан хогоо эргүүлэн цэвэрлэх гэж татвар төлөгчдийн мөнгийг салхинд хийсгэж, ээжээс биш” нам”-аас төрсөн юм шиг эрүүл ухаангүй улайран намчирхах  улс төрчдийн аргаар яагаад ч хөгжихгүй нь бололтой. Ядуу ч гэсэн цэвэрхэн айл цаанаа л дулаахан байдаг шиг хөгжлийн дээд түвшинд хүрдэггүй  юмаа  гэхэд зах замбараатай, эмх цэгцтэй л  амьдрахсан. 

              “Эцэггүй  хүний цээж том” гэдэг шиг  хатуухан дүрэм журам хаа сайгүй цагдаа камер л манай оронд хэрэгтэй юм шиг.   Харалдаа! 100 м дутам нэг цагдаа байхад дүрэм журмаа сайн л мөрдөж хонгилын үзүүрт гэрэл асаалаа.
За тэгээд хот төлөвлөлт, барилга байшин, утаа униар гээд сахилга бат, дүрэм журамтай байлгах зүйл бишгүй их гэдгийг хотын удирдлагууд анхаарна биз дээ.
                                                                                                                                                                                                                    Л.Мөнхчимэг