БЭСТА Агентлаг улирал тутамд орон сууцны үнэ ханшийн зах зээлийн судалгааг хийдэг бөгөөд 2-р улирлын судалгааны тоймоосоо хуваалцаж байна.
Хэрэв та энэхүү судалгааны дүнтэй дэлгэрэнгүй танилцах хүсэлтэй бол манай агентлагт ирээрэй. Бид танд үнэ төлбөргүй зөвлөгөө өгч мэдээлэл хуваалцахдаа баяртай байх болно.
Хуучин байрны тухайд, үнэ өмнөх улирлаас зуугуухан, дунджаар 3%-ийн өссөлттэй гарсан нь инфляцын түвшинг харгалзаж үзэх юм бол байрны бодит үнэ тогтвортой буюу бага зэргийн бууралттай байсан гэж дүгнэж болохоор байна. Энэ нь сонгууль болсон, хүмүүс зуны дэлгэр цагаар хөдөө зуслан явах, амрах зэргээр эдийн засгийн үйл ажиллагаа харьцангуй идэвхгүй болсон, банкууд зээлийн нөхцөл болон хүүгээ чангаруулсан зэрэгтэй холбоотой болов уу. Зарим хороолол, байршлуудад 1-2 өрөө байрны үнэ буурчээ. Энэ нь барилгын компаниуд массын зүгээс эрэлт ихтэй 1-2 өрөөг олноор барьж, зах зээлд боломжийн үнэтэй шинэ байрны нийлүүлэлтийг нэмэгдүүлсэнтэй холбоотой гэж хэлж болно. Мөн Засгийн Газар жилийн 6%-ийн хүүтэй 100,000 айлын орон сууц хөтөлбөр хэрэгжиж эхэллээ гэж сурталчилсан нь цөөн өрөөтэй, хямд байр авах гэж байгаа иргэдэд хүлээлт үүсгэн, үнийн бууралтад нөлөөлж байна.
Харин нэртэй, сургалт сайтай дунд сургуулиудын орчимд байрны үнэлгээ тэр дундаа 3 өрөө байрны эрэлт мэдэгдэхүйц өссөн харагдаж байна.
Жишээ нь 5-р хороолол, 220 мянгатад 3 өрөө байрны үнэ өмнөх улирлаас 14% өссөн нь энэ хавьд 1-р сургууль, “Элит” олон улсын дунд сургууль, Орос сургалттай 3-р дунд сургууль, “Сант” дунд сургууль байдагтай холбоотой болов уу.
11-р хороололд 3 өрөө байрны үнэ өмнөх улирлаас 11 хувь өссөн нь энэ хавьд “Орчлон” дунд сургууль, Хөгжим бүжгийн коллеж, “Хобби” дунд сургууль, “Логарифм” дунд сургууль, “Англи” сургууль (хуучин “Эрэл” дунд сургууль), “Гёте” дунд сургууль, “Кириллица” дунд сургууль байдагтай холбоотой гэж үзэж байна.
Өсөн дэвжиж буй гэр бүлүүд байраа томруулах, хүүхдүүдийнхээ боловсролд анхааран чанартай, сургалт сайтай дунд сургуулиудыг бараадах хандлагатай байгаа нь ажиглагдаж байна. Мөн дээрх хорооллуудаар шинээр баригдаж буй орон сууц хүрэлцээгүй, дээр нь 9-р сарын 1-ээс өмнө худалдан авах сонирхолтой байгаа нь дээрх хорооллуудын хуучны 3 өрөө байрны үнэ өсөхөд нөлөөлж байна.
Шинэ болон шинэвтэр байрнуудын тухайд Зайсан, 5-р хороолол, 40-50 мянгат, 19-р хороолол, 120 мянгат хавьцаа үнийн огцом өсөлттэй байгаа нь хотын төв хэсгийн газрын зах зээлийн үнэ цэнэ илэрхий нэмэгдэж, хотын үндсэн төвд орон сууцны зориулалттай газар шинээр олдох боломж бараг хаагдаж байгаагаас үүдэж байгаа мэт.
Мэдээллийг боловсруулсан: БЭСТА Агентлаг /besta.mn/