305 иргэний 6%-ийн зээлийн асуудал шийдэгдээд байна
МУ-ын Засгийн газраас гэр хорооллыг орон сууцжуулах, Улаанбаатар хотын утааг багасгах зорилготой санаачилсан 100.000 айлын орон сууц хөтөлбөр хэрэгжээд багагүй хугацаа өнгөрсөн. Энэ хөтөлбөрийг хэрэгжилт ямар байгаа, хэдэн иргэнд 6%-ийн зээл олгогдоод байгааг Төрийн банкны маркетинг хариуцсан ажилтан Г.Болорсүхээс тодрууллаа.
100,000 айлын орон сууцны 6%-ийн хүүтэй зээлийн хэрэгжилт ямар түвшинд явагдаж байгаа вэ?
7 сарын 09-ний байдлаар нийтдээ ОССК-иас 1928 иргэний материал манай банканд ирсэн байна. Үүнээс 305 иргэний 12 тэрбум төгрөгний зээлийн асуудлыг шийдвэрлэсэн. Одоо 250-иад хүний 7,5 тэрбум төгрөгний зээлийн асуудлыг судалж байна.
Барьцаа хөрөнгөний асуудал нилээн яригдсан. Энэ асуудлыг хэрхэн шийдвэрлэсэн бэ?
Ерөнхийдөө зээл хүсэж байгаа иргэд бүрдүүлэх бичиг баримтан дээрээ илүү нухацтай хандах хэрэгтэй байна. Орон сууц гэдэг тухайн хүний амьдралдаа хийж байгаа хамгийн том хөрөнгө оруулалт. Тиймээс тухайн иргэн хэдэн төгрөгний өрхийн орлоготой, хэдэн төгрөгний зээл авах гэж байгаа, зээлээ төлөөд хэдэн төгрөг үлдэх билээ гэж маш сайн төлөвлөгөө, тооцоогоо маш сайн гаргасаны дараа банкандаа хандах хэрэгтэй. Энэ зээлийг өнөө маргаашдаа өгөөд дуусах гэж байгаа юм шиг хандсанаас болоод бүрдүүлэх ёстой бичиг баримт нь дутуу, шаардлага хангахгүй тохиолдол гарч байна.
Зээл хүсэгч иргэдийн анхаарах 2 зүйл байгаа. Нэг нь барьцаа хөрөнгө, нөгөөдөх нь өрхийн орлогоо тодорхойлох тал дээр маш сайн анхаарах ёстой. Барьцаа хөрөнгийн асуудал дээр заавал орон сууц байх шаардлагатай. Тэгэхлээр иргэд анх удаа орон сууц авах гэж байгаа учраас барьцаа хөрөнгө байхгүй гэж яриад байна. Иймд манай банкнаас иргэдэд боломж олгох үүднээс хэд хэдэн боломжуудыг бий болгосон.
Тухайн иргэн хамаатан садныхаа орон сууцыг түр барьцаанд тавьж байгаад захиалсан барилгын үл хөдлөх хөрөнгийн бичиг баримт гарчихаар өмнөх барьцаагаа чөлөөлөөд өөрийнхөө орон сууцыг барьцаалж болно. Мөн тухайн барилгын компани барилгаараа батлан даалт гаргасан тохиолдолд барьцаа хөрөнгө шаардахгүй. Тухайн барилгыг барихад зээл олгосон банк манайд батлан даалт гаргаж өгсөн тохиолдолд зээлийг олгох гээд хэдэн боломжийг гаргаж өгсөн. Эдгээр боломжууд ч оновчтой үр дүнтэй байгаа.
Харин өрхийн орлогоо тодорхойлохдоо тухайн иргэн нийгмийн даатгал төлдөггүй бол бизнесийн хар дэвтрийг нь санхүүгийн гол баримт болгож байна. Харин гадаад ажиллаж байгаа хүн Монголд байгаа гэр бүлийнхэн рүүгээ явуулсан мөнгөний банкны баримтыг нь санхүүгийн баримт болгон авч байна. Бид бүхэн энэ төсөл хөтөлбөрийг түргэн шуурхай олгох үүднээс үе шаттай арга хэмжээ аваад ажиллаж байна.
Хөдөө орон нутаг болон гадаадад ажиллаж амьдарч байгаа иргэдийн зээл ямар шугамаар олгогдож байна вэ?
Хөдөө орон нутгийн иргэдийн зээл судлагдаж байгаа.