Шинэчлэлийн Засгийн газрын орон сууцны талаар баримталж буй бодлого, шинээр байгуулсан БХБЯ-ны зүгээс барилгын салбарт баримтлах бодлогод шинэчлэл хийх талаар ярьж байна. Тухайлбал, Барилгын тухай хуульд өөрчлөлт оруулна. Мөн ШӨХТГ-ын дарга О.Магнайтай санал солилцоно. Монголын барилгачдын холбоо, ШӨХТГ хамтын ажиллагааны гэрээтэй. Энэ хүрээнд удахгүй орон сууцны үнийн асуудалд дахин судалгаа хийх гэж байна. Бид дөрвөн сарын өмнө судалгаа хийж орон сууцны өөрийн үнийг  895000-1100000 төгрөг байна гэж гаргасан. Одоо дахин судалгаа хийж барилгын материалын үнэ яг хэд байна, хэдэн төгрөгөөр хөөсөрсөн, хэдэн төгрөгөөр үнэ нэмэгдсэн байгааг тогтооно. Мөн орон сууцны үнийг хэдэн төгрөгөөр бууруулж болохыг тодорхойлж, Орон сууцны ажлыг эрчимжүүлэх үндэсний хороогоор хэлэлцүүлж Засгийн газрын хэмжээнд шийдвэр гаргуулна. Ер нь орон сууцны үнийг бууруулах чиглэлд Монголын Барилгачдын холбоо, Засгийн газар санал нэгтэй байгаа. Орон сууцны үнийг бууруулахад хэд хэдэн чиглэлээр урьдчилан харж байна. Нэн түрүүнд 20 орчим нэр төрлийн барилгын материалыг дотооддоо үйлдвэрлэж, барилгын үнэд  тодорхой хэмжээгээр нөлөөлдөг болох юм. Цемент, арматур, будаг,  шилэн хөвөн зэргийг Монголд үйлдвэрлэж үнийг тогтвортой  барих ёстой.Энэ талаар Засгийн газар ажиллаж тодорхой хэмжээний мөнгө хөрөнгө, бонд гаргахаар болсон.  

 

Мөн гаднаас импортоор авдаг материалын чанар, үнэд судалгаа хийж төрийн зохицуулалт бий болгоно. Барилгын бөөний сүлжээ байгуулна. Ингэснээр тухайн жилдээ барилгын материалын үнийг  тогтвортой байлгах бодлого  баримтална. Бээжинд байгаа брэндийн  барилгын загварыг яг тэр хэлбэрээр Эрээнд үйлдвэрлэж Монголд оруулж ирдгийг болиулна. Заавал Хятад гэхгүй Европ, Солонгосын брэнд материалыг Монголд оруулж ирэх асуудлаар ярилцаж байна. Тухайлбал, манай холбоо Солонгосын “Наманжи” компанитай хамтарч ажиллаж байна. 

 

 

“100 мянган айлын орон сууц хөтөлбөр” зогсохгүй. Мягмар гаригийн орой Ерөнхий сайд Н.Алтанхуяг телевизээр ярилцлага өгөхдөө энэ хөтөлбөрийг зогсоохгүй харин Эрчимжүүлэх үндэсний хороо байгуулсан гэж ярьсан. Эхний ээлжинд санхүүжилтийн  механизмыг боловсронгуй болгож  4-6 хувийн хүүтэй моргэйжийн зээлийг иргэдэд хэрхэн өгөх талаар хэлэлцэнэ. Ард иргэдийг орон сууцны зээлжүүлэх чиглэлээр нөхцөл гаргаж,  хөнгөвчлөх талаар ярьсан.

 

 

Улаанбаатар хотод байгаа лед гэрлүүд бүгд хуурамч гэдгийг Солонгосын мэргэжлийн хүмүүс ирж дүгнэлт хийсэн. Тиймээс Солонгосын барилгын шалны үйлдвэр, хаалга, цонх, цоож, гэрэлтүүлгийн үйлдвэртэй холбоо тогтоож материалын дээжээс Монголд авчирч үзэсгэлэн гаргана. Жинхэнэ брэндийн чанартай материал энэ гэдгийг харуулна. Манай Зуун айлын барилгын дэлгүүрт зардаг 15 мянган төгрөгийн үнэтэй ханын цаас гэхэд дээд зэрэглэлийн ханын цаасны үнэ. Гэтэл ханын цаас адилхан дээд зэрэглэлийнх байх ёстой. Барилгын салбарт үйл ажиллагаа явуулж байгаа аж ахуйн нэгжүүд брэндийн чанартай материал гэж ямар байх ёстойг мэдэх хэрэгтэй байна. Чанартай материалын үнэ ямар байгааг харьцуулж үзмээр байна. Өндөр үнэтэй гэж ард түмэнд байраа өгчихөөд хамгийн хямд байр зарсан  байвал үнийн асуудлыг ярих талаар хамтарч ажиллах албан бичгийг нийслэлийн Засаг даргад явуулсан. 

 

Чанартай бараа бүтээгдэхүүн л өндөр үнэтэй байдаг. Гэтэл Монголд өндөр үнэ хэвшмэл болчихлоо. Тухайлбал, Зуун айлын барилгын дэлгүүрт байгаа барилгын материалыг Солонгос, Японы чанартай материалын үнээр зарж байна. Тэгсэн хэрнээ чанар нь маш доогуур байдаг.   

 

 

Бид  ШӨХТГ-тай хамтарч Зуун айлын барилгын дэлгүүрт судалгаа хийнэ. Дараа нь өндөр үнэтэй худалдаалж байгаа барилгын компаниуд үнэхээр чанартай, өндөр үнэтэй материал хэрэглэсэн байна уу гэдгийг судална. Хил гаалиас мэдээлэл авна. Гадаадын нэг ам метр чанартай обойны үнэ 15 доллар байхад манайд мөн л 15 доллар байдаг. Шалгалтаар  барилгын компаниуд үнэ нэмсэн үү, дамласан уу, үгсэн хуйвалдсан уу гэдэг нь гараад ирнэ. Эндээс барилгын үнийг ямар хэмжээнд барьж болохыг харж болно. Мөн орон сууцны үнийг бууруулахын тулд барилгын материалын бөөний сүлжээ байгуулж, тухайн жилдээ материалаа нөөцөлдөг байж болно. Манай улсын барилгын ажил хавар эхлэхээр хятадууд үнэ нэмдэг. Тиймээс манай улс өөрсдөө барилгын материал үйлдвэрлэдэг болох хэрэгтэй. ШӨХТГ, Монголын барилгачдын холбоо, МҮЭХ –ноос хийсэн шалгалтаас хамаарч барилгын салбарын үнэд өөрчлөлт орно. 

 

 

Ирэх жилийн дөрөвдүгээр сар гэхэд төр барилгын материалын үнэд ямар бодлого баримтлах нь тодорхой болно. 

 

 

Сүүлийн үед “100 мянган айлын орон сууц хөтөлбөр”-ийн хүрээнд төр дэд бүтцийг шийдэж, нийслэл газар өгөх асуудлыг ярьж байна. Тэгэхээр манай барилгын салбарт хөрөнгө оруулагчид, гүйцэтгэгчид өндөр үнэтэй барих бол өндөр үнэтэй чанартай материал хэрэглэх ёстой. Манай компанийн орон сууцны нэг ам метрийн үнэ 1.8 сая болсон гэдгээ нотлох хэрэгтэй. Хэрвээ баталж чадахгүй бол ШӨХТГ, Барилгачдын холбооны гаргасан  дүгнэлтийн дагуу 15-20 хувийн ашгаа аваад явах хэрэгтэй. 

 

Б.Ариунаа