Энэ жилийн тавдугаар сард нээлтээ хийсэн Tokyo Skytree буюу “Токиогийн тэнгэр баганадсан мод” цамхаг нь Японы хамгийн өндөр төдийгүй Бурж Халифагийн дараагаар дэлхийн хамгийн өндөр барилгын 2 дугаарт ордог. Харин цамхагийн хувьд Кантоны цамхагийн орыг эзлэж дэлхийн хамгийн өндөрт тооцогдох болсон учир 2011 оны арваннэгдүгээр сард Гиннесийн дээд амжилтын номонд бүртгэсэн юм байна. Цамхагийг аялал жуулчлалаас гадна радио болон телевизийн долгион дамжуулах зорилгоор байгуулжээ.

  Барилгын ажлыг 2008 оны долдугаар сард эхлэж, 2012 оны хоёрдугаар сард дуусгасан байна. Цамхагийн нийт өндөр 634 метр бөгөөд 65 тэрбум иен буюу 806 сая ам.долларын өртгөөр барьжээ. Энэ нь 1960-аад оноос хойш Токиогийн билэгдэл болж байсан Токиогийн цамхагаас 2 дахин өндөр билээ.

  Газар хөдлөлтийн идэвхитэй бүсэд хамаардаг Токио хотын хувьд цамхагийн аюулгүй байдлыг дээд зэргээр хангасан гэж албаны хүмүүс мэдэгдэж байгаа юм. 2011 оны гуравдугаар сард Японы зүүн хойд нутгийг хамарсан цунами болоход цамхагийн ажилд хүндрэл үүсч барилгын ажлыг хоёр сараар хойш нь татжээ. Цамхагийг барихдаа газар хөдлөлтөөс хамгаалах технологийг ашигласан бөгөөд 7 баллын газар хөдлөлтөнд тэсвэртэй гэнэ.

  Токио Скайтри цамхагийг сонирхох хүмүүс маш олон байсны дээр нээгдсэний дараах хоёр сарын тасалбарыг бүгдийг нь урьдчилан худалдаалж дуусчээ. Нээлтийн өдөр бороотой байсан ч хүмүүс үүнийг үл тоон цамхагийг сонирхохоор гадаа дугаарлан зогсож байжээ. Цамхаг нээлтээ хийсэн эхний долоо хоногт 1,6 сая хүн үзэж сонирхсоноос харахад цаашдаа аялал жуулчлалаас багагүй мөнгө олох нь харагдаж байгаа юм.