Хоёрхон жилийн өмнө хоосон байсан талбайд 32 барилга бүхий 1600 айлын орон сууц босч байна. Орон сууцны барилга бүр 56 айлтай, нэг айл нь 20-50 хүртлэх кв.метр талбайн сонголттой юм байна. Зарим байр нь ашиглалтад оржээ.

  Улаанбаатар хот, Хан-Уул дүүргийн 4-р хороо, Туул голын хөвөөн дэх “Шинэ гэр” брэндийн “Vivа City” хэмээх энэхүү хороололтой Ерөнхий сайд Н.Алтанхуяг өчигдөр танилцлаа. Амьдралын анхны алхмаа хийж байгаа залууст зориулсан, тэдний орлогод тохирсон, зай талбай багатай ч тохилог  орон сууц барьж буй “М Си Эс проперти” ХХК-ийнханд талархаж байгаагаа илэрхийлээд иргэдийг орон сууцжуулахад хувийн компани, аж ахуйн нэгжүүдийн ийм оролцоо чухал болохыг онцоллоо.

  Монгол гэр 25-30 орчим кв.метр талбайтай байдаг бөгөөд гэрт 4-6 хүн амьдардаг. Эндээс санаа авч энэхүү төслийг хэрэгжүүлж, энэ хэмжээний талбайд 2-4 ам бүлтэй айл өрхөд зориулж орчин үеийн шийдэл бүхий тавилгатай орон сууцыг төлөвлөж барьж эхэлсэн гэдгээ “M Си Эс” групийн ерөнхийлөгч Ж.Од танилцуулаад гэр хороолол болон түрээсийн байранд амьдарч буй ялангуяа, бага, дунд орлоготой иргэдэд зориулсан орон сууцыг барьж, тэднийг бага зардлаар өөрийн гэсэн хөрөнгөтэй болгох боломж олгох зорилготой гэлээ.

  Тус хорооллын барилга бүрийн нэгдүгээр давхар нь үйлчилгээний газрууд байх бөгөөд эндээс олох орлогоор дэд бүтэц болоод хорооллын тохижилтыг хийж байгаа юм байна.

  Сүүлийн хэдэн жил зээлийн хүүний хойноос их хөөцөлдсөнөөс орон сууцны үнийг хөөрөгдсөн. Шинэчлэлийн Засгийн газар орон сууцны зээлийн хүүний араас хөөцөлдөж, үнэ хөөрөгдөхгүй гэдгээ Засгийн газрын тэргүүн илэрхийлээд шинээр орон сууц барих газрыг хямд өртгөөр олгох, дэд бүтцийг нь татахад барилгын компаниудад боломж олгоход илүү анхаарна гэж мэдэгдлээ хэмээн Засгийн газрын Хэвлэл мэдээлэл, олон нийттэй харилцах албанаас мэдээллээ.