Өнөөдөр Барилгын Хөгжлийн Төвд хөнгөн бетон болон шохой үйлдвэрлэгч компанийн төлөөллүүд чуулж, бетон үйлдвэрлэлийн салбарт тулгамдаж байгаа асуудлаар ярилцлаа. Энэхүү уулзалтыг хөнгөн бетон үйлдвэрлэгч нар Барилгын материал үйлдвэрлэгчдийн холбоонд тавьсан саналын дагуу зохион байгуулжээ.

  Тус уулзалтаар хөнгөн бетоны үйлдвэрүүдийн тулгамдсан асуудал болоод байгаа түүхий эд, хөнгөн бетон болоод шохойн чанарыг дээшлүүлэх, бүтээгдэхүүн борлуулалтанд нөлөөлөх хүчин зүйл, тэдгээрийг шийдвэрлэх арга замын талаар ярилцсан юм.

  Уулзалтанд оролцсон БХБЯ-ны Барилга, Барилгын Материал Үйлдвэрлэлийн бодлого зохицуулалтын албаны дарга Б.Цэдэнсамба барилгын салбарт төрөөс баримтлах бодлогын талаар танилцууллаа. Энэ үеэр бетон үйлдвэрлэгчдийн төлөөлөгч нар бетоны үндсэн түүхий эд болох шохойн үйлдвэрлэл, түүний чанар, хүчин чадлын талаар саналаа дэвшүүлж байсны зэрэгцээ цаашдаа өөрсдөд нь тулгарч буй асуудлыг нэгтгэн зангидаж асуудлаа шийдвэрлүүлж байхыг зорьж буйгаа илэрхийлж байсан юм.