Өнөөдөр БХБЯ-ны сайд Ц.Баярсайхан Төрийн ордонд барилгын үйл ажиллагаа эхлэх, үргэлжлүүлэхэд шаардлагатай гарын үсгийн тоог бууруулсан талаар болон 100 мянган айлын орон сууцны хөтөлбөрийн талаар мэдээлэл хийлээ.

 Манай улсад 2003 оноос эхлэж Дэд бүтцийн сайд, Мэргэжлийн хяналтын газрын дарга нарын хамтарсан туушаалаар барилгын ажлыг эхлэх болон үргэлжлүүлэх зөвшөөрлийг өгч ирснийг өөрчлөх болсоныг мэдэгдлээ. Нийт барилгыг 3 ангилж үзэхээр болжээ. Нэгдүгээрт, ДЦС-ын томоохон эх үүсвэрийн барилгууд, 17 давхраас дээш барилгууд, стадион, төмөр замын буудал зэрэг олон нийтийг хамарсан барилга. Хоёрдугаарт, 16 давхар хүртэлх барилгууд, түгээх шугам, цахилгаан хангамжийн салбар шугамууд, инженерийн зарим барилга, үтрэм, зоорь хамаарна. Гуравдугаарт, иргэдийн орон сууц, их болоод урсгал засвар хийгдэх барилга байгууламжууд багтах юм.

  Өмнө нь барилгын үйл ажиллагаа эхлэхэд 100 шахам гарын үсэг зуруулж, үүний тулд 200 гаруй хоног зарцуулдаг байсныг дараагаар нь өөрчилж 80 гарын үсгийг 120 хоногт багтаан цуглуулахаар болгожээ. Харин одоо нэг болон хоёрдугаар барилгын ажил эхлэх, үргэлжлүүлэх зөвшөөрлийг нийслэл, аймгийн түвшинд "Нэг цонх"-ны үлчилгээгээр авах боломж бүрдэх юм байна. Үүний үр дүнд барилгын ажил эхлэх, үргэлжлүүлэхэд олгодог зөвшөөрлийг ердөө 30-35 хоног буюу нэг сарын дотор багтаан шийдвэрлэхээр болжээ. Мөн гарын үсгийн тоог гурав дахин цөөлсөн байна.

  Энэ үеэр 100 мянган айлын орон сууцны хөтөлбөрийн талаар мэдээлэл хийсэн. Засгийн газраас 2010 оны 36 дугаар тогтоолоор “Шинэ бүтээн байгуулалт” дунд хугацааны зорилт хөтөлбөрийн хүрээнд "100 мянган айлын орон сууцны хөтөлбөр"-ийг зарласан билээ. Энэ хөтөлбөрийн хүрээнд Засгийн газар 2011 онд 341, 2012 онд 206 тоот тогтоолыг тус тус гаргаж хөтөлбөрт багтах орон сууцны хорооллуудыг зарласан юм. Эдгээр орон сууцнуудад нийслэл хотын 158 барилга, орон нутгийн 91 барилга нийт 249 барилга багтсан. Орон сууцаар бодвол нийслэлд 100 мянга, аймгийн төвүүдэд 21 мянган орон сууцыг хөтөлбөрийн хүрээнд хамруулсан юм байна. Хөтөлбөрийг хэрэгжүүлэх явцад Засгийн газраас иргэдэд зориулж 6 хувийн хүүтэй зээл олгож эхэлсэн. Зээл олгох үйл ажиллагаа явагдах хугацаанд 4083 иргэн хүсэлт гаргаснаас 3965 иргэний хүсэлтийг Төрийн банкинд хүргүүлсэн бөгөөд эдгээр өргөдлөөс Төрийн банк 1081 иргэнд 47,3 тэрбум төгрөгийн зээл олгосон байна. Цаашид зээл олгогдох бололцоотой 705 иргэний 30 орчим тэрбум төгрөг эх үүсвэр нь хүрэлцээгүйн улмаас хүлээгдэж байна. 100 мянган айлын орон сууцны хөтөлбөрт зориулж Хөгжлийн банкинд 200 тэрбум төгрөгийн эх үүсвэр бүрдүүлэхийг зөвшөөрсөн боловч зээлийн эх үүсвэрт зориулж Төрийн банкинд 50 тэрбум төгрөг л олгосон юм. Үүнээс болж уг хөтөлбөрт хамрагдахаар өргөдлөө өгсөн иргэдийн бухимдлыг төрүүлсэн. УИХ-ын сонгуулийн өмнө зарласан учир хөтөлбөрт хэрэглэх зээл эхнээсээ тооцоо муутай байсан гэлээ. Тэгэхээр нэгэнт өргөдлөө өгсөн ч санхүүжилт нь хүрэхгүй байгаа иргэдийн асуудлыг яаж шийдэх вэ? Энэ асуудлыг Засгийн газрын хуралдаанд оруулж, Хөгжлийн банкны эх үүсвэрээс шийдвэрлэх шаардлагатай гэж тус яамны зүгээс үзэж байгаа юм байна.

 Цаашдаа иргэдийг орон сууцжуулах өөр бодлого хэрэгтэй байгааг энэ үеэр сайд онцоллоо. Засгийн газраас орон сууцны зээлийн тогтолцоог боловсронгуй болгох ажлын хэсэг байгуулсан бөгөөд Ерөнхий сайд ахалж байгаа юм байна. Иргэдийг орон сууцаар хангах үндэсний хороо хэмээх энэ ажлын хэсэг дотроо гурван хэсэгтэй байх юм. Нэгдүгээрт, орон сууцны шинэ хотхон хороолол барих, ашиглалтын шаардлага хангахгүй байгаа орон сууцыг дахин төлөвлөх үүрэгтэй ажлын хэсэг. Хоёрдугаарт, орон сууцны санхүүжилтийн механизм, зээлийн тогтолцоог сайжруулах санал боловсруулах ажлын хэсэг байна. Гуравдугаарт, гэр хорооллыг барилгажуулах ажлын хэсгийг Э.Бат-Үүл даргаар ахлуулаад ажил нь эхэлчихсэн явж байна гэлээ.