Орон сууцны захиалгын гэрээгээр хохирсон иргэдийн эрх ашгийг хамгаалах, үүссэн нөхцөл байдлыг шийдвэрлэх чиг үүрэг бүхий ажлын хэсэг ажиллаж байна.Тус ажлын хэсэг орон сууцны захиалгын гэрээнээс хохирсон иргэдийн судалгаа, цаашид авч хэрэгжүүлэх арга хэмжээний талаар хэлэлцсэн байна. Цагдаагийн байгууллагын мэдээллээр 2024-2026 онд Эрүүгийн хуулийн 17.3 дугаар зүйлд заасан залилах гэмт хэргийн 39,665 тохиолдол бүртгэгдэн шалгагдсанаас орон сууцны захиалга авч бусдыг залилсан 1,167 хэрэг бүртгэгджээ. Хэрэг бүртгэлт, мөрдөн байцаалтын шатанд байгаа хэргүүдийн хүрээнд 995 иргэнд нийт 64.5 тэрбум төгрөгийн хохирол учирсан бөгөөд 79 иргэн, 22 хуулийн этгээдэд холбогдох 259 хэрэг шалгагдаж байгаа аж.

Орон сууцны захиалгын гэрээгээр иргэд хохирохоос урьдчилан сэргийлэх, худалдан авагчдын эрх ашгийг хамгаалах чиглэлээр хууль эрх зүйн орчныг боловсронгуй болгох асуудал мөн яригдаж байна. Энэ хүрээнд Барилгын ерөнхий хуулийн шинэчилсэн найруулгын төсөлд "Орон сууц худалдан авах явцад иргэдийн эрх ашгийг хамгаалах, залилан мэхлэлтийн эрсдэлийг бууруулахад чиглэсэн зохицуулалт" тусгахаар ажиллаж байгаа талаар салбарын сайд мэдээлсэн.Мөн орон сууцны захиалгын гэрээг бүртгэлжүүлэх, гэрээтэй холбоотой эрхийг хамгаалах, үүргээ биелүүлээгүй компаниудад хариуцлага тооцох зэрэг зохицуулалтыг боловсронгуй болгох шаардлагатай байгаа юм.

Ажлын хэсгээс цагдаагийн байгууллагад шалгагдаж байгаа залилах гэмт хэргийн шийдвэрлэлтийг эрчимжүүлэх, ялангуяа олон хохирогчтой, их хэмжээний хохиролтой орон сууцны хэргүүдийн мөрдөн шалгах ажиллагааг шуурхай явуулах чиглэл өгчээ. Мөн цагдаа, прокурорын байгууллага хамтран ажиллаж, орон сууцны захиалгын гэрээнээс хохирсон иргэдийн тоо, хохирлын хэмжээг үнэн зөвөөр нэгтгэн гаргах үүрэг хүлээсэн байна. Ингэснээр орон сууцны захиалгын гэрээгээр иргэд хохирох эрсдэлийг бууруулах, барилгын компани болон худалдан авагчийн хоорондын гэрээний харилцааг илүү тодорхой болгох, цаашид ижил төрлийн зөрчил, залилан гарахаас урьдчилан сэргийлэх эрх зүйн орчныг бүрдүүлэхээр ажиллаж байна.Одоо хэрэгжиж буй хуулийн зохицуулалтыг боловсронгуй болгож, орон сууц захиалагч иргэдийн мөнгөн хөрөнгийг хамгаалах, барилгын төслийн хэрэгжилт болон захиалгын гэрээнд тавих хяналтыг сайжруулах нь цаашид ижил төрлийн хохирол дахин үүсэхээс сэргийлэх гол нөхцөл болж байна.