Монгол Улсын нийслэл Улаанбаатар хотноо зохион байгуулагдаж буй Цөлжилттэй тэмцэх тухай НҮБ-ын конвенцын талуудын 17 дугаар бага хурал (UNCCD COP17)-ын хүрээнд олон нийт, бизнес эрхлэгчид, иргэний нийгмийн байгууллагууд оролцох боломжтой "Ногоон бүсийн зэрэгцээ арга хэмжээ" 2026 оны 8 дугаар сарын 18-ны өдрөөс эхлэх гэж байна.  

Энэхүү арга хэмжээ нь өдөр бүр зориултод сэдвийн дор өрнөх бөгөөд олон улсын болон дотоодын мэргэжилтнүүд, залуучууд, бизнес эрхлэгчид чуулж, байгаль орчныг хамгаалах, цөлжилттэй тэмцэх шинэлэг шийдлүүдийг хэлэлцэх юм. Хэлэлцүүлгүүд Цагаадай, Өгэдэй, Тулуй танхимуудад нэгэн зэрэг явагдах бөгөөд та өөрийн сонирхсон сэдвийн дагуу хөтөлбөрөө урьдчилан төлөвлөх боломжтой.

Гурван өдрийн хөтөлбөрийг тоймлон хүргэж байна.

 8-р сарын 18 | ИНТЕРАКТИВ ӨДӨР

"Интерактив өдөр"-өөр инноваци, боловсрол, залуучуудын оролцоонд тулгуурласан арга хэмжээнүүд зохион байгуулагдах бөгөөд Цагаадай танхимд 6 хэлэлцүүлэг, Өгөдэй танхимд 3 хэлэлцүүлэг болон 5 сайн туршлага, харин Тулуй танхимд 18 төсөл тус тус хэлэлцэгдэнэ.  

• Онцлох сэдвүүд: "Газраа нөхөн сэргээж, амьдралаа сэргээе", "Нотолгоонд суурилсан бэлчээрийн мал аж ахуйн тогтвортой ирээдүй", "Органик хатуу болон шингэн хог хаягдлын менежмент дэх технологийн сорилт ба шинэлэг шийдлүүд".  
• Онцлох эвент: Цагаадай танхимд 16:30 цагаас "TEDxUlaanbaatarSalon - Итгэл найдварын шинэ төсөөлөл" болно. Мөн Өгэдэй танхимд "Интерактив туршилтаар дамжуулсан STEAM ба байгальд суурилсан сургалт" явагдана.  

8-р сарын 19 | ХҮН ТӨВТ ӨДӨР 

"Хүн төвт өдөр" нь газрын доройтлыг бууруулахад орон нутгийн иргэд, эмэгтэйчүүд, залуучуудын үүрэг оролцоог нэмэгдүүлэхэд чиглэх бөгөөд Цагаадай танхимд 6 хэлэлцүүлэг, Өгөдэй танхимд 3 хэлэлцүүлэг болон 6 сайн туршлага, харин Тулуй танхимд 18 төсөл тус тус хэлэлцэгдэнэ.  

• Онцлох сэдвүүд: "Жендэрийн эрх тэгш байдал, эмэгтэйчүүдийн газрын эрх", "Залуучуудын манлайлал ба байгаль орчны хамгаалал", "Иргэний нийгэм ба хүртээмжтэй засаглал".  
• Онцлох эвент: "Говь-Алтай аймгийн Хөх морьт сумын сайн туршлага: Элсний нүүдлийг сааруулах, цөлжилтийг бууруулах арга аргачлал" зэрэг орон нутгийн сайн туршлагуудыг хуваалцах арга хэмжээ зохион байгуулагдана.  

8-р сарын 20 | БИЗНЕСИЙН ӨДӨР 

"Бизнесийн өдөр"-өөр байгаль орчинд ээлтэй бизнес, ногоон эдийн засаг, тогтвортой санхүүжилтийн механизмуудыг хэлэлцэх бөгөөд Цагаадай танхимд 6 хэлэлцүүлэг, Өгэдэй танхимд 3 хэлэлцүүлэг болон 4 сайн туршлага, харин Тулуй танхимд 17 төсөл тус тус хэлэлцэгдэнэ.  

• Онцлох сэдвүүд: "Ойн санхүүжилт", "Тэсвэртэй Говийн шинжлэх ухааны үндэс суурийг бий болгох нь", "БНХАУ, Япон, БНСУ-ын хамтарсан тоос, элсэн шуурганы судалгааны (TEMM DSS) олон нийтэд зориулсан семинар".  
• Онцлох эвент: "Ногоон бонд: Газрын доройтлыг саармагжуулах, цөлжилттэй тэмцэхэд чиглэсэн тогтвортой санхүүжилтийн хэрэгсэл" хэлэлцүүлэг явагдана.  

НҮБ-ын Цөлжилттэй тэмцэх конвенцын талуудын 17 дугаар бага хурал (COP17) нь Монгол Улсад төдийгүй дэлхий нийтэд тулгамдаад буй уур амьсгалын өөрчлөлт, цөлжилтийн эсрэг нэгдэн тэмцэх, бодит гарц шийдэл хайх хамгийн чухал арга хэмжээ юм. Байгаль эхээ хамгаалах, ногоон эдийн засгийг хөгжүүлэх, тогтвортой ирээдүйг цогцлоох энэхүү үйлсэд иргэн, аж ахуйн нэгж бүрийн оролцоо чухал тул та бүхэн энэхүү түүхэн ач холбогдолтой тус арга хэмжээнд идэвхтэй оролцохыг хүсье.

Хөтөлбөрийн дэлгэрэнгүйг ЭНД дарж танилцана уу.