Төрийн орон сууцны корпораци (ТОСК) ТӨХХК-иас Хан-Уул дүүргийн 21-р хороонд хэрэгжүүлж буй "Солонго 1, 2" төслийн эхний ээлж болох 2042 айлын орон сууц удахгүй ашиглалтад ороход бэлэн болжээ. Үүнтэй холбогдуулан Засгийн газрын 81-р тогтоолоор батлагдсан журмын дагуу орон сууцыг түрээслэх, өмчлүүлэх сонгон шалгаруулалтын бүртгэлийг наймдугаар сарын сүүлээр буюу есдүгээр сарын эхээр эхлүүлэхээр төлөвлөж байгааг ТОСК-ийн Захиргаа, удирдлагын газрын дарга Ж.Энхбаатар мэдэгдлээ. Бүртгэл эхлэхээс өмнө холбогдох яамтай хамтран хэвлэлийн бага хурал зохион байгуулж, иргэдэд дэлгэрэнгүй зааварчилгаа мэдээлэл өгөх юм байна.

Бүртгэл 100 хувь цахимаар, 14 хоногийн турш явагдана

Бүртгэл зөвхөн ТОСК-ийн албан ёсны цахим хуудас болох tosk.gov.mn сайтаар 100 хувь цахимаар явагдах бөгөөд ойролцоогоор 14 хоног үргэлжлэх аж.

Иргэд "ДАН" системийг ашиглан нэвтрэх тул төрд байгаа мэдээллийн санд үндэслэн ямар нэгэн нэмэлт цаасан тодорхойлолт, бичиг баримт шаардахгүй. Мэдээллээ оруулж баталгаажуулсны дараа системээс автоматаар оноог тооцож, иргэд хэдэн оноотойгоор хэддүгээр байранд жагсаж байгаагаа шууд харах боломжтойгоор программчлагджээ.

Бүртгүүлэхдээ: 1. Төсөлөө сонгоно  2. мквадратын хэмжээгээ сонгоно 3.Бүлэг /Ахмад настан, залуу гэр бүл гэх мэт /  4. Регистрийн дугаар оруулна   5. Утас   6. И- мэйл хаяг оруулаад дан систем дээр баталгаажуулсны дараа гар утасны дугаар дээр мэдээлэл ирэх юм.  

Сонгон шалгаруулалтад оролцох иргэдэд дараах үндсэн шаардлагуудыг тавьж байна. Үүнд:

• Улаанбаатар хотод байнга оршин суудаг, эрх зүйн бүрэн чадамжтай, 18 насанд хүрсэн Монгол Улсын иргэн байх.

• Гэр хороололд амьдардаг, өөрийн өмчлөлийн инженерийн хангамжтай орон сууцгүй (өмнө нь өмчилж байгаагүй) байх.

• Тогтвортой ажлын байртай, тухайн байгууллагадаа 1-ээс дээш жил ажилласан байх.

 Шалгаруулалтыг тухайн бүртгүүлж буй нэг иргэнээр бус, гэр бүлээр нь (өрхөөр) дүгнэх юм. Тухайн өрхөд хэдэн хүн орлого олдог, гишүүдийн зээлийн мэдээлэл зэргийг нэгтгэн тооцно. Сар бүр төлөх түрээсийн төлбөр нь өрхийн сарын дундаж орлогын 45 хувиас хэтрэхгүй байх шаардлагатай. Мөн зорилтот бүлэг болох өндөр настан, өрх толгойлсон иргэн, хөгжлийн бэрхшээлтэй зэрэг нөхцөл давхцсан тохиолдолд давуу эрхийн оноо нэмж олгох ажээ. Иргэн хүсвэл орон сууцны төлбөрийн нийт дүнгээс өөрийн боломжит хэмжээгээр урьдчилгаа төлбөр төлж болох зохицуулалттай байна.

Түрээсийн төлбөр м.кв нь 11,880-15,800 төгрөг байна

Түрээсийн орон сууцны нэг сарын төлбөрийг хөдөлмөрийн хөлсний доод хэмжээ буюу 792,000 төгрөгтэй уялдуулан тогтоожээ. Улаанбаатар хотын хувьд байрны м.кв-ийн үнэ барилгын насжилт, чанараас хамааран 11,880-15,800 төгрөгийн хооронд хэлбэлзэнэ. Жишээлбэл, 50 м.кв талбайтай байрыг хамгийн дээд тал нь 792,000 төгрөгөөр түрээслэнэ гэсэн үг юм. Сонгон шалгаруулалтад тэнцсэн иргэдтэй гэрээ байгуулах зэрэг бичиг баримтын ажлыг дуусгаад, есдүгээр сарын сүүлээр айлуудыг орон сууцанд нь оруулахаар зорьж байна.