Нийслэлийн төсвийн хөрөнгө оруулалтаар Чингэлтэй дүүргийн 17 дугаар хороонд хэрэгжиж буй 37 дугаар сургуулийн усан бассейн бүхий спорт заалны бүтээн байгуулалтын ажил 80 гаруй хувийн гүйцэтгэлтэй үргэлжилж байна. Хүүхдийн хөгжлийг дэмжсэн энэхүү бүтээн байгуулалтын ерөнхий гүйцэтгэгчээр “Люмос Максима” ХХК ажиллаж байна.

Одоогоор барилгын дотор заслын ажлууд ид явагдаж байгаа бол, цаашид дараах ажлуудыг үе шаттайгаар хийж гүйцэтгэхээр төлөвлөжээ. Үүнд инженерийн нарийвчилсан шугам сүлжээний холболт , спортын болон усан бассейны тусгай тоног төхөөрөмж суурилуулалт , гадна болон дотоод орчны иж бүрэн тохижилт орж байгаа юм

Ерөнхий боловсролын сургуулийн орчинд усан бассейн болон спорт цогцолбор байгуулах нь зөвхөн сургуулийн өнгө үзэмжийг нэмэхээс илүүтэйгээр, хүүхэд багачуудын хувьд асар их ач холбогдолтой юм. Энэхүү төсөл бүрэн ашиглалтад орсноор сурагчдын суралцах орчин нөхцөл сайжраад зогсохгүй хүүхдүүдийн бие бялдрын өв тэгш хөгжил, эрүүл мэндийг хамгаалах, дархлааг дэмжин чийрэгжүүлэх нөхцөл , мэргэжлийн спортоор хичээллэх, чөлөөт цагаа эрүүл, зөв боловсон өнгөрүүлэх  зэрэг  нэн таатай орчин бий болж байгаа юм. Нийслэлийн зүгээс хүүхдийн эрүүл мэнд, боловсролд чиглүүлэн хийж буй энэхүү хөрөнгө оруулалт нь ирээдүйн эрүүл, идэвхтэй иргэнийг төлөвшүүлэхэд үнэтэй хувь нэмэр оруулах бүтээн байгуулалт болж байна.