Улаанбаатар хотын гэр хорооллыг орчин үеийн, ухаалаг дэд төв болгон хөгжүүлэх "Сэлбэ хот" төслийн бүтээн байгуулалтын нийт гүйцэтгэл 36.69 хувьд хүрээд байна. Барилга угсралтын ажил 22.02 хувь, газар чөлөөлөлт 96 хувийн явцтай үргэлжилж байгаа бөгөөд төслийн эхний шатанд 8575 айлын орон сууцыг 2027 онд ашиглалтад оруулахаар төлөвлөжээ.

Төслийг Улаанбаатар хот хэрэгжүүлж байгаа бөгөөд долоон багц ажлын хүрээнд  үндэсний дөрөв,  гадаадын гурван компани ерөнхий гүйцэтгэгчээр ажиллаж байна. Барилгын талбайд өдөр бүр 1700 орчим инженер, техникийн ажилтан, 70–80 нэгж машин механизм ажиллаж байгаа юм.Төсөл нь Улаанбаатар хотын Сэлбэ дэд төвийн бүсэд хэрэгжиж байгаа бөгөөд гэр хорооллыг орчин үеийн орон сууц, худалдаа үйлчилгээ, ногоон байгууламж, инженерийн дэд бүтэц бүхий шинэ хот болгон хөгжүүлэхээр төлөвлөсөн байна.

Бүтээн байгуулалтын ажил одоо ид өрнөж, төслийн эхний шатанд 113 блок бүхий 8575 айлын орон сууцыг 2027 онд ашиглалтад оруулах бол дараагийн шатанд 2028–2030 онд худалдаа, үйлчилгээ, оффис болон 2138 айлын орон сууц бүхий олон нийтийн бүсийг байгуулна.

Төслийн зорилго нь Улаанбаатар хотын гэр хорооллыг үе шаттайгаар шинэчилж, иргэдийн амьдрах орчныг сайжруулах, ухаалаг инженерийн дэд бүтэц, ногоон байгууламж, чанартай орон сууц бүхий олон улсын жишигт нийцсэн шинэ хотын загварыг бий болгоход оршиж байна.

 Барилгын материалын 70–80 хувийг үндэсний үйлдвэрлэгчид нийлүүлж байгаа нь төслийн бас нэгэн онцлог болж байна.

Төсөлд бүрэн цутгамал хийц, зэс хоолойн сантехникийн систем, гурван давхар шилэн цонх, металл фасад зэрэг удаан эдэлгээтэй материал ашиглаж, чанарын хатуу хяналт хэрэгжүүлж байна. Мөн төслийн явц, санхүүжилт, төлөвлөлтийг Digital Twin болон MonMap системээр бодит цаг хугацаанд иргэдэд нээлттэй харуулах бэлтгэл хангаж байгаа юм.