Хот Байгуулалт, Барилга, Орон Сууцжуулалтын Яам 2027 оны улсын төсвийн төслийн хүрээнд шинээр хэрэгжүүлэх хөрөнгө оруулалтын төсөл, арга хэмжээг олон нийтэд танилцууллаа. 

Ирэх онд салбарын хэмжээнд нийт 26 шинэ төсөл, арга хэмжээнд 164.1 тэрбум төгрөгийн хөрөнгө оруулалт хийхээр төлөвлөж байгаа бөгөөд үүний дийлэнхийг инженерийн дэд бүтцийн бүтээн байгуулалтад зарцуулахаар тусгажээ.

Шинэ хөрөнгө оруулалтын хамгийн том багцыг инженерийн шугам сүлжээний өргөтгөл эзэлж байна. Улаанбаатар хот болон 10 аймагт хэрэгжих 15 төсөлд нийт 149.2 тэрбум төгрөг төсөвлөснөөс 67.5 тэрбум төгрөгийг 2027 онд санхүүжүүлэхээр төлөвлөсөн байна.

Эдгээр төслийн хүрээнд 18.2 км цэвэр усны, 43.9 км бохир усны, 11.6 км дулааны, 35.7 км цахилгааны, 31.3 км холбооны шугам, мөн 70.9 км үерийн хамгаалалтын далан, суваг шинээр байгуулна. Ингэснээр 27 мянга гаруй өрх инженерийн шугам сүлжээнд холбогдож, 20 мянга гаруй өрх үерийн эрсдэлээс хамгаалагдах боломж бүрдэх юм.

Мөн Хан-Уул дүүрэгт хэрэгжиж буй "Залуус-1" орон сууцны хорооллын инженерийн дэд бүтцийн ажлыг үргэлжлүүлэхээр 14.9 тэрбум төгрөгийн хөрөнгө оруулалт тусгажээ. Төсөл бүрэн хэрэгжсэнээр нийт 5,616 айлын орон сууц ашиглалтад орох юм.

Түүнчлэн төрийн албан хаагчдыг орон сууцжуулах хөтөлбөрийн II үе шат эхэлж, 10 байршилд 150 айлын орон сууц барихаар төлөвлөсөн байна. Энэхүү төслийн нийт төсөв 32 тэрбум төгрөг бөгөөд ирэх онд 16 тэрбум төгрөгийн санхүүжилт хийхээр тусгажээ.

Харин 2024-2027 онд хэрэгжиж буй төрийн албан хаагчдыг орон сууцжуулах I үе шатны хүрээнд 44 байршилд 471 айлын орон сууц баригдаж байгаа бөгөөд одоогийн байдлаар төслийн нийт гүйцэтгэл 30 хувьтай үргэлжилж байна.

Хот байгуулалт, барилга, орон сууцжуулалтын яамны танилцуулснаар, 2027 оны хөрөнгө оруулалт нь инженерийн дэд бүтцийн хүртээмжийг нэмэгдүүлэх, орон сууцжуулалтыг эрчимжүүлэх, бүсчилсэн хөгжлийн бодлогыг хэрэгжүүлэхэд чиглэсэн томоохон бүтээн байгуулалтын ажлуудыг үргэлжлүүлэхэд чиглэж байгаа аж.