БНХАУ-ын Бээжин хотод  Дэлхийд алдартай “Заха Хадид Архитектс” (ZHA) архитектурын фирмийн зураг төслөөр 140 метр өндөр “Z8 Tower” олон зориулалттай цамхгийн төслийг 2026 оны 7 дугаар сард танилцуулж, барилгын ажлыг эхлүүлэхэд бэлэн болсноо мэдээллээ. 

“Z8 Tower” нь Бээжингийн CBD-ийн төв цэцэрлэгт хүрээлэнгийн эсрэг талд Чанъань өргөн чөлөөний орчны онцлогтой уялдуулан төлөвлөгджээ.

Барилгын архитектурын шийдэл нь бизнесийн зориулалттай өндөр барилгаас гадна хүмүүсийн ажиллах, худалдаа хийх, хооллох, соёлын арга хэмжээнд оролцох, амрах боломжтой олон талт нийтийн орон зайг нэг дор бүрдүүлэхэд чиглэж байна.

Барилгын цэцэрлэгт хүрээлэн рүү харсан баруун талын фасад нь ногоон байгууламжтай уялдсан шаталсан терасс, олон давхар атриумуудаар шийдэгдсэн нь гаднах ногоон орчныг барилгын дотоод орон зайтай холбож, байгаль болон архитектурын уялдааг бий болгохыг зорьжээ.

Бээжин хотын эх газрын уур амьсгалд тохируулан барилгын шилэн фасадад босоо нарны хамгаалалтын хавтангуудыг суурилуулжээ. Энэ нь зуны улиралд нарны шууд тусгал болон хэт халалтыг бууруулж, өвлийн улиралд дулааны алдагдлыг багасгах зориулалттай. Мөн атриум болон нийтийн галерейгаар дамжуулан байгалийн гэрлийг дотоод орон зайд нэвтрүүлж, агаарын солилцоог сайжруулахаар төлөвлөжээ.