Нийслэлийн Баянхошуу, Шархад дэд төвүүдэд хэрэгжиж буй "Орлогод нийцсэн ногоон орон сууц" төслийн хүрээнд нийт 5,000 айлын орон сууцыг хоёр үе шаттайгаар барихаар төлөвлөжээ. 

Азийн хөгжлийн банк, Уур амьсгалын ногоон сангийн санхүүжилттэй энэхүү төслийн хүрээнд Шархад дэд төвд 3 га талбайд 338 айлын эко хороолол байгуулж, нийт орон сууцны 10 хувийг тусгай хэрэгцээт иргэдэд зориулан хүртээмжтэйгээр төлөвлөсөн байна. 

Төслийн эхний ээлжийн дөрвөн блок бүхий 110 айлын ногоон орон сууцны барилга ашиглалтад орж, 2026 оны долоодугаар сарын 3-нд Улсын комисс хүлээн авчээ. Харин хоёрдугаар ээлжийн зургаан блок, 228 айлын орон сууцны барилга угсралтын ажил 72 хувийн гүйцэтгэлтэй үргэлжилж байна.

Энэхүү төсөл нь хөгжлийн бэрхшээлтэй болон тусгай хэрэгцээт иргэдийн амьдрах орчны хүртээмжийг сайжруулж, олон улсын "EDGE" ногоон барилгын стандартад нийцсэн, эрчим хүчний хэмнэлттэй орон сууцаар хангах зорилготой юм.