Монгол Улсын Их Хурлын нийтийн өргөдлийн системд (petition.parliament.mn) ажил олгогчийн төлдөг нийгмийн даатгалын шимтгэл (НДШ)-ийн зохицуулалтыг шинэчлэх тухай өргөдлийг иргэн Г.Батсүх санаачлан нийтэлжээ.

Тус өргөдөлд ажил олгогчоос төлдөг нийгмийн даатгалын шимтгэлийг хүчингүй болгож, зөвхөн ажилтны шимтгэлд суурилсан тогтолцоонд шилжих эрх зүйн орчныг бүрдүүлэх тухай хуулийн төсөл боловсруулахыг УИХ-аас хүссэн байна.

Монгол Улсын хууль тогтоомжийн дагуу нийтийн өргөдөлд 100,000 иргэн дэмжиж гарын үсэг зурсан тохиолдолд уг асуудлыг Улсын Их Хурлаар албан ёсоор хэлэлцэх эрх зүйн үндэс бүрдэх юм.

Одоогийн тогтолцоогоор ажил олгогчид ажилтанд олгож буй цалин, хөлсний сангаас гадна өөрийн хөрөнгөөр нийгмийн даатгалын шимтгэл төлдөг. Энэхүү нэмэлт зардал нь аж ахуйн нэгжүүдийн хөдөлмөрийн зардлыг өсгөж, шинэ ажлын байр бий болгох, ажилтны цалинг нэмэгдүүлэх, бизнесийн үйл ажиллагаагаа өргөжүүлэх боломжид сөргөөр нөлөөлж байна гэж санаачлагчид үзэж байна.

Ялангуяа жижиг, дунд үйлдвэр, үйлчилгээ эрхлэгчдийн хувьд ажилтан бүрд ногдох ажил олгогчийн шимтгэл нь санхүүгийн томоохон ачаалал болж, албан ёсны хөдөлмөр эрхлэлтийг нэмэгдүүлэх, цалин хөлсийг бодитоор өсгөхөд хүндрэл учруулдаг гэж тайлбарлажээ.

Олон улсын туршлагаас харахад нийгмийн даатгалын тогтолцооны санхүүжилтийн хэлбэр улс орон бүрд ялгаатай байдаг. Зарим улс орон ажил олгогчийн хөдөлмөрийн зардлыг бууруулах, татвар болон нийгмийн хамгааллын тогтолцоонд шинэчлэл хийх замаар ажлын байр, хөрөнгө оруулалт, эдийн засгийн өсөлтийг дэмжих бодлого хэрэгжүүлдэг байна.

Өргөдөлд дараах асуудлуудыг УИХ-аар хэлэлцэн шийдвэрлэхийг хүсжээ. Үүнд:

• Ажил олгогчоос төлдөг нийгмийн даатгалын шимтгэлийн зохицуулалтыг өөрчлөх, холбогдох хуулийн төсөл боловсруулах;

• Энэхүү өөрчлөлт нь улсын төсөв, нийгмийн даатгалын сангийн орлого, ажил эрхлэлт, цалингийн өсөлтөд үзүүлэх нөлөөллийг нарийвчлан тооцож, үнэлэх;

• Шинэ тогтолцоонд шилжих үеийн зохицуулалт болон нийгмийн даатгалын сангийн тогтвортой байдлыг хангах бодлогын хувилбаруудыг боловсруулах.

Иргэн Г.Батсүхийн санаачилсан уг өргөдлийг дэмжих хүсэлтэй иргэд Монгол Улсын Их Хурлын албан ёсны нийтийн өргөдлийн систем болох petition.parliament.mn-ээр дамжуулан гарын үсгээ зурах боломжтой. Мөн доорх линкийг ↓ дарж  санал өгөх боломжтой.