Барилгын салбарын хамгийн сүүлийн үеийн мэдээ мэдээлэл, онцлох зочдын ярилцлага, салбарын цаг үеийн сэдвүүдийг хөнддөг Барилга МН сэтгүүлийн 07 дугаар сарын дугаар буюу 194 дэх хэвлэлт уншигчдадаа хүрч эхэллээ. 

Энэ удаагийн сэтгүүлийн нүүр хуудсанд TUZHI  хаалга, цонхны профиль үйлдвэрлэлийн компани хамтран ажиллаа. 

Онцлох булангуудаас танилцуулъя. 

VIP ярилцлага: О.ЭРДЭНЭ-ОЧИР: БИЗНЕСТ БОГИНО ХУГАЦААНЫ АШИГ БИШ УРТ ХУГАЦААНЫ ИТГЭЛЦЭЛ ХАМГИЙН ЧУХАЛ

Барилгын салбартаа томоохон төслүүдийг амжилттай хэрэгжүүлж, цаг хугацаа, чанар, менежментийн шинэ жишгийг тогтоож буй "Роял Хаус Констракшн" компанийн гүйцэтгэх захирал О.Эрдэнэ-Очирыг энэ удаагийн VIP ярилцлагадаа урьж ярилцлаа. Тэрээр маркетинг болон бизнесийн менежмент хосолсон мэргэжлээр Сингапур улсад дээд боловсрол эзэмшиж, улмаар АНУ -д мэргэжил дээшлүүлэн суралцжээ. 2021 оноос тус компанийн гүйцэтгэх захирлын албан тушаалд томилогдон ажиллаж байгаа юм.

ХӨНДӨХ СЭДЭВ: ОРОН СУУЦНЫ САНХҮҮЖИЛТИЙН ТУСГАЙ БАНК Хөгжлийн гарц уу, зах зээлийн сорилт уу?

Монгол Улсын Засгийн газраас иргэдийн орон сууцжих боломжийг нэмэгдүүлэх, орон сууцны санхүүжилтийн тогтолцоог шинэчлэх зорилгоор Орон сууцны санхүүжилтийн төрөлжсөн банк байгуулах тухай хуулийн төслийг Улсын Их Хуралд өргөн мэдүүлээд байна. Энэхүү санаачилга нь ипотекийн зээлийн хүртээмжийг нэмэгдүүлж, урт хугацааны санхүүжилтийн эх үүсвэрийг бий болгох зорилготой бөгөөд нийгэмд ихээхэн хүлээлт үүсгээд байна.

Засгийн газар үүнийг орон сууцны санхүүжилтийн шинэ шатны реформ гэж тодорхойлж байгаа бол шүүмжлэгчид төр санхүүгийн зах зээлд шууд оролцох нь үнийн хөөрөгдөл, нөөцийн буруу хуваарилалт, засаглалын эрсдэлийг дагуулж болзошгүйг анхааруулж байна.

Тэгвэл энэхүү мега төсөл нь хөгжлийн шинэ боломж нээх үү, эсвэл зах зээлийн шинэ сорилтыг бий болгох уу?

МИНИЙ ТҮҮХ: Д.АЛТАНХИШИГ: ЗАЛУУ НАСАА ӨР ТӨЛӨХӨД БИШ, АМЬДРАХАД ЗОРИУЛААСАЙ ГЭЖ ХҮСДЭГ.

Өнөөдөр олон залуу гэр бүл хамтын амьдралаа эхлүүлэхдээ хамгийн түрүүнд орон сууцны асуудалтай нүүр тулдаг. Хоёр, гурван өрөө байртай болохын тулд олон арван жилийн хугацаатай зээл авч, амьдралынхаа ид хөдөлмөрлөж, бүтээх он жилүүдийг өр төлөхөд зориулдаг нь нууц биш.

Харин Дархан-Уул аймагт амьдардаг зураач Д.Алтанхишиг эхнэрийн хамт хуримтлуулсан мөнгөөрөө эзэмшлийн хашаандаа уламжлалт монгол гэрийн хэлбэрийг орчин үеийн ахуйн шийдэлтэй хослуулсан “гэр-хаус” барьж, гэр бүлийн хамт амьдарч байна. Энэ удаад түүний түүхийг хуваалцлаа. 

МЭРГЭЖИЛТНИЙ ҮГ: ХОТЫН ХӨГЖЛИЙН ЕРӨНХИЙ ТӨЛӨВЛӨГӨӨГ ИРГЭДИЙН АЮУЛГҮЙ АЖИЛЛАЖ АМЬДРАХ НӨХЦӨЛИЙГ  БИЙ БОЛГОХ ЗОРИЛТОД НИЙЦҮҮЛЭХ

Хот байгуулалтын төрийн бодлого нь ""Алсын хараа-2050" Монгол Улсын урт хугацааны хөгжлийн бодлого", Монгол Улсын бүсчилсэн хөгжлийн үзэл баримтлал, Шинэ бүтээн байгуулалт дунд хугацааны зорилтот хөтөлбөр зэрэг бодлогын баримт бичгүүдэд хотын зэрэглэл, хөгжлийн тэргүүлэх чиглэлүүдийг тодорхойлж зохих хэмжээгээр тусгагдсан байна. 

Хот байгуулалтын тухай хуульд байгаль орчин, орон сууц, хотын үйлчилгээ, инженерийн дэд бүтэц, тээвэр, харилцаа холбоо зэрэг нийтийн үйлчилгээг зохицуулж буй хуулиуд хамааралтай төдийгүй  хот байгуулалт нь өргөн хүрээг хамаарах ойлголт тул түүнийг зохицуулах хууль тогтоомж мөн адил өргөн хүрээг хамаарч байна.

Ийнхүү олон хуулийг хамарсан томоохон салбарын хууль тул бусад холбогдох хуулиудтай зөрчилтэй зохицуулалтууд их байгаа нь хуулийн хэрэгжилтэд сөргөөр нөлөөлөх нэг шалтгаан болсон байна. Энэ талаарх дэлгэрэнгүй нийтлэлийг энэхүү дугаараас хүлээн авч уншаарай. 

НИЙТЛЭЛ: “ГООЖИНГИЙН ӨНДӨР”-ИЙГ НИЙСЛЭЛ ӨМЧДӨӨ БУЦААН АВЛАА. ХАРИН ТҮҮХИЙГ ХЭН АВРАХ ВЭ?

Улаанбаатар хотын 385 гаруй жилийн түүхийг өгүүлэх барилга байгууламж өнөөдөр хуруу дарам цөөн үлджээ. Тэдгээрийн нэг нь Баянзүрх дүүргийн 6 дугаар хорооны нутаг дэвсгэрт орших, 114 жилийн түүхтэй “Гоожингийн өндөр” юм.

Нэгэн цагт Нийслэл Хүрээний хамгийн өнгөлөг, содон барилгуудын нэгт тооцогдож байсан энэхүү байшин өнөөдөр өндөр орон сууцны хорооллын дунд хавчигдан, хаалга цонх нь эвдэрч, эзэнгүй балгас мэт орхигджээ. Харин 2026 онд нийслэл уг барилгыг өмчдөө буцаан авснаар олон жил үргэлжилсэн өмчлөлийн маргаан эцэслэв. Гэвч өмчлөлийн асуудал шийдэгдсэнээр түүхэн өвийг аврах асуудал шийдэгдсэн гэсэн үг биш юм.

АРХИТЕКТУР ДИЗАЙН: ХАНЖӨҮГИЙН ТУРШИЛТЫН СУРГУУЛЬ БОЛОВСРОЛЫН АРХИТЕКТУРЫН ШИНЭ ПАРАДИГМ

Архитекторуудын дизайны эх сурвалж нь Ханжөү хотын олон зуун жилийн боловсролын уламжлалаас урган гарсан байна. Мин гүрний үед (1368–1644) Ханжөүд багш нар сурагчдадаа усан дээгүүр бадамлянхуа цэцэг, мод дундуур хөвж явсан завин дотроос хичээл заадаг байсан, байгальд маш ойр, нээлттэй боловсролын аргыг хэрэглэж байсан түүхтэй. MONOARCHI студи энэхүү түүхэн холбоог орчин үеийн архитектурын хэлээр сэргээн дахин амилуулсан юм.

Мөн барилгын төв тэнхлэгийн дагуух шат бүрийг гурван өөр хэлбэрийн шатлалыг хослуулан зохиосон нь сурагч, багш нарын дунд уулзаж, амрах, ярилцах орон зай болсныг архитекторууд онцолжээ. Энэхүү барилгын архитектурын сонирхолтой түүхийн талаар энэхүү булангаас хүлээн авч уншаарай. 

Мөн та Мэргэжилтний үг, Шинэ материал, Мэргэжилтний зөвлөмж булан барилгын салбарт болсон хамгийн сүүлийн үеийн гадаад болон дотоод мэдээ мэдээллийг хүлээн авч уншаарай. 

Түүнчлэн шинэ орон сууцны үнэ ханш, ажил гүйцэтгэх үнэлгээ, барилгын материалын үнэ ханшийг шинэчилсэн байдлаар харах боломжтой.  

СЭТГҮҮЛ ЗАХИАЛАХ 

Утас: 9100-0233, 7711-3333