Хот Байгуулалт, Барилга, Орон Сууцжуулалтын яамны сайд Э.Бат-Амгалан 2026 оны зургаадугаар сарын 30-нд Германы Шпаркассэ банкны Олон улсын хамтын ажиллагааны сангийн гүйцэтгэх захирал Никлаус Бэргманн тэргүүтэй төлөөлөгчдийг хүлээн авч уулзан, Монгол Улсад орон сууцжуулалтын тогтолцоог боловсронгуй болгох, хуримтлалд суурилсан орон сууцны санхүүжилтийн Баушпаркассе (Bausparkasse) загварыг нутагшуулах боломжийн талаар санал солилцов.

Уулзалтын үеэр сайд Э.Бат-Амгалан орон сууцны санхүүжилт болон орон сууцны нийлүүлэлтийг дэмжих эрх зүйн орчны шинэчлэлийн хүрээнд хоёр хуулийн төсөл боловсруулж, Улсын Их Хуралд өргөн мэдүүлэхээр ажиллаж байгааг танилцууллаа. Тэрбээр эдгээр шинэчлэл нь зорилтот бүлгийн иргэдийн орон сууцны хүртээмжийг нэмэгдүүлэхэд чиглэж байгааг онцолж, төрийн бодлого нь хувийн хэвшилтэй өрсөлдөх бус, иргэдийн орон сууцтай болох боломжийг нэмэгдүүлэхэд чиглэнэ гэдгийг тэмдэглэв.

Шпаркассэ банкны төлөөлөгчид Баушпаркассе тогтолцоог Монгол Улсад хэрэгжүүлэхдээ Германы туршлагыг шууд хуулбарлах бус, Монголын хууль эрх зүй, санхүүгийн орчинд нийцүүлэн нутагшуулах шаардлагатайг онцлов. Энэхүү загвар нь дунд болон дундаас доогуур орлоготой иргэдийг урт хугацааны хуримтлалд суурилсан орон сууцны санхүүжилтээр дэмжих боломжтойг тэмдэглэв.

Талууд мөн Германы орон сууцжуулалтын бодлого, газар чөлөөлөлт, инженерийн дэд бүтэц, санхүүжилтийн тогтолцоонд төрийн оролцооны туршлагыг судалж, Монголын нөхцөлд хэрэгжүүлэх боломжийн талаар санал солилцлоо.

Уулзалт нь Монгол Улсад иргэдийн орон сууцны хүртээмжийг нэмэгдүүлэх, тогтвортой санхүүжилтийн тогтолцоог бүрдүүлэх, Германы олон жилийн туршлагыг дотоодын нөхцөлд нийцүүлэн хэрэгжүүлэх чиглэлээрх хамтын ажиллагааг өргөжүүлэхэд чухал ач холбогдолтой боллоо.