Хот Байгуулалт, Барилга, Орон Сууцжуулалтын яамны сайд Э.Бат-Амгалан ипотекийн зээлийн хүүг 8–14 хувийн шаталсан тогтолцоотой болгох саналыг хуулийн төсөлд тусгахаар ажиллаж буйгаа 2026.06.19-нд хэвлэлд өгсөн ярилцлагадаа мэдэгдсэн байна.

Тэрбээр ипотекийн зээлийн эх үүсвэр зөвхөн зургаан хувийн хүүтэй зээлээр хязгаарлагдаж байгаа нь иргэдийг 4–5 жил хүртэл хугацаанд хүлээлгэдэг болсныг онцолжээ. 

Үүний улмаас олон иргэн 18 ба түүнээс дээш хувийн хүүтэй арилжааны банкны орон сууцны зээлд хамрагдах эсвэл орон сууц худалдан авах боломжоо алдаж байгаа тул ипотекийн зээлийн эх үүсвэрийг төрөлжүүлэх шаардлагатай гэж үзэж буйгаа илэрхийлсэн байна.

Мөн УИХ-д өргөн баригдсан Орон сууцжуулалтын тухай болон Орон сууцны санхүүжилтийн төрөлжсөн банк байгуулах тухай хуулийн төслүүд нь орон сууцны эрэлт, нийлүүлэлтийг дэмжиж, үнийн өсөлтийг тогтворжуулах зорилготой гэдгийг дурджээ. 

Хэрэв эдгээр хуулийн төсөл батлагдвал ипотекийн зээлийн эх үүсвэр нэмэгдэж, иргэдийн зээл хүлээх хугацааг 1–2 жил хүртэл бууруулах боломжтой гэж үзэж байгаагаа мөн илэрхийлсэн байна.