Хиймэл оюун ухаан (AI) нь барилгын салбарын ирээдүйн өрсөлдөх чадварыг тодорхойлох стратегийн технологи болж байна. Энэ хүрээнд зохион байгуулагдсан “AI Барилгын бизнесийн хурдасгуур” сургалт, хэлэлцүүлэг 2026 оны 6 дугаар сарын 25-ны өдөр Барилгын хөгжлийн төвийн “Барилгачин” танхимд амжилттай зохион байгуулагдаж, салбарын мэргэжилтнүүд, бизнес эрхлэгчид, технологийн салбарын төлөөллүүд хиймэл оюун ухааны хэрэглээ, боломж, хөгжлийн чиг хандлагын талаар санал солилцлоо.

Тус арга хэмжээг Барилга МН ерөнхий зохион байгуулагчаар, Барилгын хөгжлийн төв хамтран зохион байгуулагчаар, Барилгачин групп ивээн тэтгэгчээр оролцож, барилгын салбарын дижитал шилжилт, технологийн шинэчлэлийг дэмжих зорилгоор зохион байгуулсан юм.

Арга хэмжээний үеэр хиймэл оюун ухааныг барилгын салбарт бодитоор ашиглах боломж, хэрэгжүүлэлтийн туршлагын талаар илтгэлүүд тавигдлаа.

“Хиймэл оюун ухааныг үр дүнтэй ашиглах нь” сэдвээр Стартап Монгол, Айтрип үүсгэн байгуулагч С.Эрдэнэбат,

“Barilga.mn-д хиймэл оюун ухаан нэвтрүүлэх нь” сэдвээр “Гайхалтай төсөл” ХХК-ийн ТУЗ-ын дарга Г.Амгаланбаяр,

“Тавилга, интерьерийн рендерийг AI ашиглан хийх нь” сэдвээр UI/UX дизайнер Б.Отгонбаяр,

“Барилгын ханган нийлүүлэлтийн шинэ тогтолцоо” сэдвээр Барилгачин группийн ерөнхий захирал Г.Батсүх нар тус тус илтгэл танилцууллаа.

Мөн “Хиймэл оюун ухаан барилгын салбарын хөгжлийг хурдасгах уу?” сэдвийн хүрээнд нээлттэй хэлэлцүүлэг өрнөж, салбарын төлөөллүүд AI-ийн өнөөгийн хэрэглээ, цаашдын хөгжлийн чиглэл, тулгамдаж буй асуудлуудын талаар байр сууриа илэрхийллээ.

Хэлэлцүүлгийг Барилга МН үүсгэн байгуулагч, ТУЗ-ын дарга Г.Батсүх удирдсан бөгөөд панелистаар “Гайхалтай төсөл” ХХК-ийн төлөөлөл Г.Амгаланбаяр, “Номин констракшн девелопмент” группийн барилгын инженер Г.Түмэндэмбэрэл, Build AI барилгын төслийн менежментийн системийг үүсгэн байгуулагч, CEO Ц.Мөнхбилэг нар оролцлоо.

Мөн AI нь инженер, мэргэжилтнүүдийг орлох бус харин тэдний мэдлэг, ур чадварыг дэмжиж, илүү бүтээлч, үр ашигтай шийдэл боловсруулах боломжийг нэмэгдүүлэх технологи болохыг онцолсон юм.

Оролцогчид Монгол Улсад AI-ийн хэрэглээг хөгжүүлэхийн тулд төр, хувийн хэвшил, их сургууль, мэргэжлийн байгууллагуудын хамтын ажиллагаагөргөжүүлэх шаардлагатайг онцолсон юм. Түүнчлэн барилгын салбарт AI ашиглах эрх зүйн болон бодлогын орчныг бүрдүүлэх, салбарын мэргэжилтнүүдийн AI мэдлэг, ур чадварыг нэмэгдүүлэх хэрэгцээ байгааг хэлэлцэв.

Хэлэлцүүлгийн үеэр оролцогчид хиймэл оюун ухаан нь барилгын салбарын бүтээмжийг нэмэгдүүлэх, төсөв, хугацаа, эрсдэлийн удирдлагыг сайжруулах, зураг төсөл боловсруулах, төслийн менежмент, үл хөдлөх хөрөнгийн маркетинг, борлуулалтын үйл ажиллагааг шинэ түвшинд хүргэх өргөн боломжтой гэдэг дээр санал нэгдлээ.

Хэлэлцүүлгийн төгсгөлд “Барилгын салбарын хиймэл оюун ухааны хөгжлийг дэмжих” санал, зөвлөмж боловсруулж, холбогдох төрийн байгууллагуудад хүргүүлэхээр шийдвэрлэлээ.

Үүнд: Санал, зөвлөмжид барилга, хот байгуулалтын салбарт AI-ийн хэрэглээг хөгжүүлэх үндэсний стратеги боловсруулах, BIM, GIS, барилгын зөвшөөрөл, мэдээллийн сан зэрэг салбарын өгөгдлийг AI ашиглах боломжтой хэлбэрт шилжүүлэх, шинэ AI бүтээгдэхүүн, шийдлийг турших орчин бүрдүүлэх, инженер, архитектор, төсөвчин, төслийн менежерүүдэд зориулсан AI сургалтыг үндэсний хэмжээнд хэрэгжүүлэх зэрэг асуудлууд багтсан байна.

Мөн Монгол хэл дээрх барилгын норм, дүрэм, стандарт, техникийн нөхцөл, зураг төслийн мэдээллийг AI хөгжүүлэх үндэсний дата сан болгон бүрдүүлэх, AI-ийн хэрэглээнд мэдээллийн аюулгүй байдал, хүний хяналт, зохиогчийн эрх, хариуцлагын зарчмыг тодорхой болгох шаардлагатайг онцоллоо.

Оролцогчид хиймэл оюун ухаан нь барилгын салбарын чанар, аюулгүй байдал, ил тод байдлыг нэмэгдүүлэх чухал боломж гэдэг байр суурийг илэрхийлж, Монгол инженерүүд AI технологийг ашиглан дэлхийн зах зээлд өрсөлдөх боломжтойг тэмдэглэв.“AI Барилгын бизнесийн хурдасгуур” сургалт, хэлэлцүүлэг нь Монголын барилгын салбарын дижитал шилжилт, инновацад суурилсан хөгжлийн шинэ үеийг эхлүүлэх чухал алхам болж, цаашдын AI хөгжлийн бодлого, хамтын ажиллагааны суурь болсон арга хэмжээ боллоо.