Монголын Барилгын Үндэсний Ассоциаци болон Барилгын хөгжлийн төв хөгжлийн томоохон төслүүдэд үндэсний компаниудын оролцоог нэмэгдүүлэх, салбарын эрх зүйн орчин болон хүний нөөцийн чадавхыг бэхжүүлэх чиглэлээр хамтран ажиллах санамж бичиг байгууллаа.

Монголын Барилгын Үндэсний Ассоциацийн гишүүн байгууллагууд нь Монгол Улсын бүтээн байгуулалтын ажлын 60 орчим хувийг хэрэгжүүлдэг үндэсний компаниудын нэгдэл бөгөөд төрийн чиг үүрэг болох тусгай зөвшөөрөл олгох үйл ажиллагааг найм дахь жилдээ амжилттай хэрэгжүүлж байна.

Монгол Улсын урт хугацааны хөгжлийн бодлого болох Алсын хараа–2050 болон Монгол Улсын Засгийн газрын 2024–2028 оны үйл ажиллагааны хөтөлбөр-т барилга, дэд бүтцийн салбарыг дэмжих, үндэсний аж ахуйн нэгжүүдийн өрсөлдөх чадварыг нэмэгдүүлэх зорилтыг тусгасан. Энэхүү бодлогын хүрээнд Монголын Барилгын Үндэсний Ассоциацийн Ерөнхийлөгч Н.Баярсайхан, Барилгын хөгжлийн төвийн захирал Д.Мөнхбаатар нар хамтын ажиллагааны санамж бичигт гарын үсэг зурлаа.

Санамж бичгийн хүрээнд талууд:

• Олон улсад хүлээн зөвшөөрөгдсөн инженеринг болон барилгын гэрээний жишиг нөхцөлийг орчуулах, нутагшуулах, хэрэглэхтэй холбоотой мэргэшсэн боловсон хүчин бэлтгэх, хамтарсан санаачилга гаргах, шаардлагатай төсвийг тусгах;
• Хөгжлийн төслүүдийн хүрээнд үндэсний компаниудын оролцоог хангах, үнэлгээнд давуу эрх тусгах, оролцох боломжийг нэмэгдүүлэх арга хэмжээг холбогдох хууль, журамд нийцүүлэн хэрэгжүүлэх;
• Барилга, дэд бүтэц, үл хөдлөх хөрөнгө, эрчим хүч болон худалдан авах ажиллагааны эрх зүйн орчныг боловсронгуй болгох, хүний нөөцийн чадавхыг нэмэгдүүлэх, барилгын материалын үйлдвэрлэлийг дэмжих, салбар хоорондын хамтын ажиллагааг өргөжүүлэх талаар санал боловсруулах, мэргэжлийн дэмжлэг үзүүлэх;
• Инженер, техникийн мэргэжлийг олон нийтэд сурталчлах, оюутан, суралцагчдыг дэмжих, нийслэлийн хөгжлийн төслүүдэд инноваци, дэвшилтэт технологийг нэвтрүүлэх санал боловсруулж, хэрэгжилтэд хамтран оролцох чиглэлээр харилцан дэмжиж ажиллахаар тохиролцов.

Энэхүү хамтын ажиллагаа нь үндэсний барилгын компаниудын өрсөлдөх чадварыг нэмэгдүүлэх, хөгжлийн томоохон төслүүдэд оролцох боломжийг өргөжүүлэх, салбарын тогтвортой хөгжилд бодит хувь нэмэр оруулах ач холбогдолтой юм.