Улаанбаатар хотын шинэ Төв цэвэрлэх байгууламжийг 2026 оны 06 сарын 16-ны өдөр  ашиглалтад орууллаа. Энэхүү томоохон бүтээн байгуулалт нь нийслэлийн инженерийн дэд бүтцийг шинэ шатанд гаргах чухал төсөл болж байна.

Нээлтийн ажиллагаанд Монгол Улсын Ерөнхийлөгчийн Тамгын газрын дарга А.Үйлстөгөлдөр, Хот Байгуулалт, Барилга, Орон Сууцжуулалтын яамны сайд Э.Бат-Амгалан, Гадаад харилцааны сайд Б.Батцэцэг, “Барилгын хөгжлийн төв” ТӨҮГ-ын захирал Д.Мөнхбаатар болон БНХАУ-ын Гадаад хэргийн сайд Ван И тэргүүтэй албаны төлөөлөгчид оролцлоо.

Сонгинохайрхан дүүргийн 20 дугаар хорооны нутаг дэвсгэрт 17.6 га талбайд баригдсан шинэ Төв цэвэрлэх байгууламж нь 35 төрлийн 55 барилга байгууламжаас бүрдэж байна. Тус байгууламж нь хоногт 250 мянган шоо метр хаягдал ус цэвэрлэх хүчин чадалтай бөгөөд нийслэлийн хүн амын өсөлт, үйлдвэрлэлийн хөгжлийг дагасан ирээдүйн хэрэгцээг хангахуйц байдлаар төлөвлөгджээ. Мөн хаягдал ус цэвэрлэх явцад үүсэх лагийг боловсруулан эрчим хүч үйлдвэрлэх технологийг нэвтрүүлсэн бөгөөд ингэснээр байгууламжийн дотоод эрчим хүчний хэрэглээний 35 орчим хувийг өөрөө хангах боломж бүрдэж байна.

Нээлтийн үеэр Хот Байгуулалт, Барилга, Орон Сууцжуулалтын яамны сайд Э.Бат-Амгалан энэхүү төсөл нь Улаанбаатар хотын иргэдийн эрүүл, аюулгүй орчинд амьдрах нөхцөлийг сайжруулахад онцгой ач холбогдолтойг тэмдэглэж, бүтээн байгуулалтад оролцсон нийт ажилтан, инженер, мэргэжилтнүүдэд талархал илэрхийллээ.

Шинэ Төв цэвэрлэх байгууламж ашиглалтад орсноор нийслэлийн бохир ус цэвэрлэх хүчин чадал нэмэгдэж, байгаль орчны бохирдлыг бууруулах, усны нөөцийг хамгаалах, тогтвортой хөгжлийг дэмжихэд бодит хувь нэмэр оруулах юм.