Барилгын салбарын төв хэвлэл Барилга МН сэтгүүлийн 193 дахь дугаар уншигчдадаа хүрч эхэллээ. 

Энэ удаагийн нүүр хуудсанд Муза Рус ХХК компани хамтран ажиллаа. “Муза рус” ХХК нь мод, модон эдлэлийн үйлдвэрлэл, худалдааны чиглэлээр үйл ажиллагаа явуулахаар 2016 оны 6 дугаар сард байгуулагдаж, 2023 оны 04 дүгээр сараас бүрэн автомат тоног төхөөрөмж бүхий үйлдвэрийн барилгаа бүрэн ашиглалтад оруулан евро стандартын модон хаалга үйлдвэрлэн дотооддоо нийлүүлж, зах зээлийн эрэлт хэрэгцээг бүрэн хангах, импортын бүтээгдэхүүний нийлүүлэлтийг бууруулах зорилготой ажиллаж байна.

Онцлох булангууд: 

VIP ЯРИЛЦЛАГА: Э.ХУВИЛАЙ: BIM БОЛ БАРИЛГЫН САЛБАРЫН ЦАХИМЖИЛТЫН ТҮЛХҮҮР ЮМ

Барилга, хот байгуулалтын салбар бол улс орны хөгжлийн түүчээ, эдийн засгийн гол тулгуур багануудын нэг билээ. Бид салбартаа тулгамдаж буй асуудлууд, орчин үеийн технологийн чиг хандлага, тэр дундаа барилгын салбарын ирээдүйг тодорхойлж буй BIM (Building Information Modeling) - ын талаар ярилцахаар нэгэн эрхэм зочныг урьсан юм. Манай энэ удаагийн зочин бол БНСУ-ын Йонсей  их сургуульд барилгын инженерчлэлийн чиглэлээр докторын (Ph.D) зэрэг хамгаалж, эх орондоо дөнгөж ирээд байгаа залуу эрдэмтэн, барилгын инженер Э.Хувилай юм.

Ингээд түүний БНСУ-д хийсэн судалгааны ажил, Монголын барилгын салбарын өнөөгийн макро нөхцөл байдал болон BIM технологийн ирээдүйн талаар хийсэн сонирхолтой ярилцлагыг энэ дугаараас хүлээн авч уншаарай. 

ХӨНДӨХ СЭДЭВ: ШИНЭ БУДГИЙН ҮНЭР ҮҮ? ЧИМЭЭГҮЙ ХОРДЛОГО УУ?

“Хүн юу иднэ, тийм л байдаг” хэмээх Германы философич Людвиг Фейербах хэлсэн байдаг. Харин өнөөдөр идэж буй зүйлдээ төдийгүй амьдарч, амьсгалж буй орчиндоо ч анхаарах шаардлагатай болжээ. Дэлхийн хүн ам өдөр тутмынхаа цагийн 90 орчим хувийг дотоод орчинд өнгөрүүлдэг гэх судалгаа бий. Манай улсын хувьд хүйтэн уур амьсгалаас шалтгаалан энэ үзүүлэлт илүү өндөр байх магадлалтай.

Ялангуяа хүүхдүүд өдөрт 8–10 цагийг сургууль, цэцэрлэгийн орчинд өнгөрөөж байна.

Тэгвэл “Тэдний сурч, хүмүүжиж буй орчин аюулгүй юу? ” гэсэн асуултад хариулт хайж энэхүү “Хөндөх сэдэв” нийтлэлийг хүргэж байна.

АМИНЫ ОРОН СУУЦ: АМИНЫ ОРОН СУУЦАД НАР БОЛОН БАТАРЕЙ СИСТЕМИЙГ УХААЛГААР ТӨЛӨВЛӨХ НЬ

Сүүлийн жилүүдэд эрчим хүчний бие даасан байдал, ногоон технологийн хэрэглээ дэлхий даяар төдийгүй Монгол улсад эрчимтэй нэмэгдэж байна. Ялангуяа амины орон сууц, барилга байгууламжид нарны хавтан болон батарей хуримтлуулуурын хосолсон системийг нэвтрүүлэх нь эдийн засгийн хэмнэлттэйгээс гадна байгаль орчинд ээлтэй шийдэл болоод байна. Нар болон батарей систем гэдэг нь нарны эрчим хүчийг ашиглан цахилгаан үйлдвэрлэж, илүүдэл энергийг батарейд хадгалдаг ухаалаг эрчим хүчний шийдэл юм. Энэ систем нь цахилгаан тасарсан үед нөөц тэжээл болж ажиллах боломжтойгоороо онцлог.

Энэхүү нийтлэлд хувийн орон сууц барихаар төлөвлөж буй иргэдэд зориулан нар болон батарей системийг хэрхэн ухаалгаар төлөвлөх, техникийн шаардлагыг хэрхэн зөв тодорхойлох талаар хүргэж байна.

НИЙТЛЭЛ: УЛААНБААТАРЫН ТҮҮХИЙН ДУРСГАЛТ БАРИЛГУУД- АХМАДЫН ХОЛБООНЫ БАРИЛГА

Улаанбаатар хот нь тэртээ 1639 онд "Өргөө" нэртэйгээр анх байгуулагдсанаас хойш даруй 385 жилийн урт удаан түүхийг туулжээ. Гэвч энэхүү баялаг, урт удаан түүхээс өнөөдөр хотын түүхийг гэрчлэх архитектурын дурсгалт ердөө 50 гаруйхан барилга үлдсэн нь туйлын хангалтгүй, харамсалтай тоо юм. Энэ нь бид хотынхоо ой санамжийг хэрхэн устгаж ирсний тод илрэл болж байна.

 Манай улсад өнөө үед эдгээр барилгуудыг яг адилхан барих технологи байхгүй бөгөөд хэрэв нураавал хотын түүхэн дүр төрх, иргэдийн дурсамж, нийслэлийн онцлогийг хадгалж буй сүүлчийн холбоосууд бидний болон ирээдүй үр хойчоос минь үүрд арилах болно. Энэ удаагийн дугаартаа АХМАДЫН ХОЛБООНЫ БАРИЛГА түүхээс хуваалцаж байна. 

МЭРГЭЖИЛТНИЙ ҮГ: ХОТЫН ХӨГЖЛИЙН ЕРӨНХИЙ ТӨЛӨВЛӨГӨӨГ ИРГЭДИЙН АЮУЛГҮЙ АЖИЛЛАЖ АМЬДРАХ НӨХЦӨЛИЙГ БИЙ БОЛГОХ ЗОРИЛТОД НИЙЦҮҮЛЭХ НЬ 

Хот байгуулалтын төрийн бодлого нь ""Алсын хараа-2050" Монгол Улсын урт хугацааны хөгжлийн бодлого", Монгол Улсын бүсчилсэн хөгжлийн үзэл баримтлал, Шинэ бүтээн байгуулалт дунд хугацааны зорилтот хөтөлбөр зэрэг бодлогын баримт бичгүүдэд хотын зэрэглэл, хөгжлийн тэргүүлэх чиглэлүүдийг тодорхойлж зохих хэмжээгээр тусгагдсан байна. 

Хот байгуулалтын тухай хуульд байгаль орчин, орон сууц, хотын үйлчилгээ, инженерийн дэд бүтэц, тээвэр, харилцаа холбоо зэрэг нийтийн үйлчилгээг зохицуулж буй хуулиуд хамааралтай төдийгүй  хот байгуулалт нь өргөн хүрээг хамаарах ойлголт тул түүнийг зохицуулах хууль тогтоомж мөн адил өргөн хүрээг хамаарч байна.

Ийнхүү олон хуулийг хамарсан томоохон салбарын хууль тул бусад холбогдох хуулиудтай зөрчилтэй зохицуулалтууд их байгаа нь хуулийн хэрэгжилтэд сөргөөр нөлөөлөх нэг шалтгаан болсон байна. Энэ талаарх дэлгэрэнгүй нийтлэлийг энэхүү дугаараас хүлээн авч уншаарай. 

Мөн та Мэргэжилтний үг,  Архитектур дизайн булан болон барилгын салбарт болсон хамгийн сүүлийн үеийн гадаад болон дотоод мэдээ мэдээллийг хүлээн авч уншаарай.