Монголын Барилгын Инженерүүдийн Холбоо болон Монголын Бетоны Холбоо хамтран 2026 оны зургаадугаар сарын 9-ний өдөр “Барилгын материал ба барилга бүтээцийн цаашдын хөгжлийн чиг хандлага” сэдэвт техникийн семинарыг амжилттай зохион байгууллаа.

Семинарт Монгол Улс болон Япон Улсын эрдэмтэн, судлаачид оролцож, барилгын материал, бүтээцийн салбарын шинэ технологи, судалгаа хөгжүүлэлт болон олон улсын туршлагын талаар илтгэл тавьж, санал солилцсон байна.

Арга хэмжээний үеэр дараах сэдвүүдээр илтгэл тавилаа. Үүнд:

• Ногоон барилгын материалын судалгаа, хөгжүүлэлт;
• Дулаан хадгалах чадвартай (PCM) хөөсөн бетоныг ашиглан эрчим хүчний хэмнэлттэй барилгын материал хөгжүүлэх боломж;
• Япон Улсын угсармал төмөр бетон ханан барилгын газар хөдлөлтийн тэсвэрлэлтийн тооцоо, зураг төслийн шийдэл;
• Япон Улсын бүтээцийн хоёр үе шатлалт төлөвлөлтийн аргачлал болон холбогдох норм, нормативын зохицуулалт:

Семинарын хүрээнд оролцогчид барилгын материал, бүтээцийн салбарын хөгжлийн өнөөгийн чиг хандлага, инновацын шийдэл, газар хөдлөлтийн эрсдэлийг бууруулах инженерийн аргачлал, эрчим хүчний хэмнэлттэй барилгын технологийн талаар мэдлэг, туршлага солилцсон юм.

Тус арга хэмжээ нь барилгын материал, бүтээцийн салбарын судалгаа, хөгжүүлэлтийг дэмжих, олон улсын сайн туршлага, дэвшилтэт технологийг нутагшуулах, инженер техникийн ажилтнуудын мэдлэг, ур чадварыг дээшлүүлэх, мэргэжлийн байгууллагуудын хамтын ажиллагааг өргөжүүлэхэд чухал ач холбогдолтой болж өнгөрлөө.