2026 оны тавдугаар сарын байдлаар жилийн зургаан хувийн хүүтэй орон сууцны ипотекийн зээлд хамрагдах хүсэлт гаргасан 47 мянга гаруй иргэн хүлээлгийн жагсаалтад байгааг Монголбанк мэдээллээ. 

Одоогийн нөхцөлд иргэдийн хүсэлт дунджаар 5-6 жил хүлээгдэж байгаа нь уг хөтөлбөрийг эрх зүйн хувьд шинэ шатанд гаргах шаардлага үүссэнийг албаныхан онцолж, энэ асуудлаар Монголбанк болон Засгийн газар санал нэгдээд байгаа аж.

2013 оноос хэрэгжиж эхэлсэн ипотекийн зээлийн хөтөлбөрт өнөөдрийг хүртэл 140 мянга гаруй өрх хамрагдаж, нийт 10.7 их наяд төгрөгийн зээл авчээ. Харин 2020 онд ипотекийн зээлийн хүүг найман хувиас зургаан хувь болгон бууруулснаар орон сууцны эрэлт эрс нэмэгдэж, улмаар үнийн өсөлтөд нөлөөлсөн талаар судалгаанууд харуулж байна. Тухайлбал, 2013 онд орон сууцны медиан үнэ 111.4 сая төгрөг байсан бол 2024 онд хоёр дахин өсөж, өсөлт цаашид ч үргэлжилж байгаа аж.

Ипотекийн хөтөлбөр хэрэгжиж эхэлсэн үед инфляцын түвшин зээлийн хүүгээс доогуур байсан тул санхүүжилтийн тогтолцоо тогтвортой ажиллаж байжээ. Харин өнөөдөр инфляц есөн хувиас давж, ипотекийн зээлийн хүү зургаан хувь болсон нь санхүүжилтийн эх үүсвэрт дарамт учруулж байгаа аж. 

Мөн ипотекийн зээлийн эрэлт өндөр хэвээр байгаа ч нийлүүлэлтийн талд шаардлагатай санхүүжилт хүрэлцэхгүй байгаа нь орон сууцны үнийн өсөлтийг өдөөж буй гол хүчин зүйлсийн нэг болж байгааг мэргэжилтнүүд онцоллоо. 

Иймээс ипотекийн зээлийн тогтолцоог боловсронгуй болгох зорилгоор Орон сууцны санхүүжилтийн банкны тухай болон Орон сууцжуулалтын тухай хуулийн төслүүдийг боловсруулж байгаа бөгөөд барилгын компаниудад батлан даалт, санхүүгийн дэмжлэг үзүүлэх, мөн ипотекийн шалгуур хангахгүй иргэдэд түрээсийн болон түрээслээд өмчлөх боломжийг өргөжүүлэх шаардлагатай байгааг албаныхан тэмдэглэлээ.