Засгийн газрын 2026 оны зургаадугаар сарын 3-ны өдрийн ээлжит хуралдаанаар Орон сууцны санхүүжилтийн төрөлжсөн банкны тухай болон Орон сууцжуулалтын тухай анхдагч хуулийн төслүүдийг хэлэлцэн дэмжиж, Улсын Их Хуралд өргөн мэдүүлэхээр боллоо.

Энэ талаар Хот Байгуулалт, Барилга, Орон Сууцжуулалтын Яамны сайд Э.Бат-Амгалан мэдээлэхдээ, орон сууцжуулалтын банк нь тусгай зориулалтын төрөлжсөн банк байх бөгөөд арилжааны банкуудтай өрсөлдөхгүй гэдгийг онцлов.

Тэрээр, тус банк нь гадаад, дотоодын бонд босгох замаар эх үүсвэрээ нэмэгдүүлж, орон сууцны санхүүжилтийн хүртээмжийг өргөжүүлэх боломж бүрдүүлэх аж. Мөн өнөөгийн нөхцөлд сарын гурван сая төгрөгөөс доош орлоготой иргэд ипотекийн зээлд хамрагдах боломж хязгаарлагдмал байгаа тул ипотекийн зээлийг зорилтот бүлэгт чиглүүлэн олгох бодлого хэрэгжүүлэхээр төлөвлөж буйг дурдлаа.

Сайд Э.Бат-Амгалан “Орон сууцны бодлогын нийлүүлэлтийн тал өнгөрсөн жилүүдэд орхигдож ирснийг онцлов. Тиймээс Орон сууцжуулалтын тухай хуулиар Төрийн орон сууцны корпорац (ТОСК)-ийг болон Нийслэлийн орон сууцны корпорац (НОСК)-ийг татан буулгаж, нэгтгэн зохион байгуулна. Ингэснээр давхардсан чиг үүргийг бууруулж, орон сууцжуулалтын бодлого, хэрэгжилтийг илүү оновчтой удирдах боломж бүрдэнэ” хэмээн мэдэгдэв.

Хуулийн төслүүд УИХ-аар хэлэлцэн батлагдвал орон сууцны санхүүжилтийн шинэ тогтолцоог бүрдүүлэхийн зэрэгцээ орон сууцны нийлүүлэлт, хүртээмжийг нэмэгдүүлэх эрх зүйн орчин бүрдэх юм.